Guwahati, Naiwieng 07
Ki pulit ka jylla Assam ha ka Sngi Ba-ar ki la pyntip ba ki la ïoh ban bat ïa 32 tylli ki masi ba la kit na ka thaiñ Numaligarh bad ïa kiba la thmu ban pynpoi sha Byrnihat ha Meghalaya.
Ka jingïoh bat jong ki pulit ïa ka trok kaba kit ïa kitei ki masi ka long hadien ba ki la ïoh ïa ka jingtip ba tikna. Na kane ka trok, ki la ïoh ban bat ïa 32 tylli ki masi.
Uwei u heh pulit u la ïathuh ba ïa kitei ki masi la wanrah na ka thaiñ Numaligarh ha Assam bad la thmu ban pynpoi sha Byrnihat ha Meghalaya.
Ha kaba ïadei bad kane, ki pulit ki la ïoh kem ïa arngut ki briew ba la tip kyrteng kum u Ashraful Alam bad u Zakir Ahmed. Na ka liang ki pulit ki la pynlong ïa ka jingtohkit ban lap ïa kiwei pat kiba donkti ha kane ka kam.
Kum ban shu pynkynmaw, ha une u juh u bnai, ki pulit ki la ïoh bat ïa 44 tylli ki masi bad la kem ïa arngut ki briew. Kine ki masi ki dei kiba la wan kit na Nagaon distrik bad la thmu ban wanrah sha Byrnihat ha Meghalaya.
