Shillong, Naiwieng 07
Ka jingslem ka Sorkar Jylla ban pynbna ïa ki ‘mark’ jong ki kompani kiba shim bynta ha ka ‘tender’ na ka bynta ban ïoh pynïaid ïa ka 108 ambulance ha kane ka Jylla ka la nang pynslem ban ïoh kloi ïa ka kompani kaba dei ban shimti thymmai ban ai jingshakri.
Katba nang pynslem, la nang mih sa ki kynrum-kynram ha kaba la paw ha ki lad pathai khubor ïa ki jingbymbiang jong ki katto-katne ki kompani kiba wan ban ïashim bynta ha ka ‘tender’ kaba la pynmih da ka Sorkar.
Ka tyllong khubor ka ïathuh ba ki kompani kiba kwah ban pynïaid ïa ka 108 ambulance ha Jylla ki la ïashim bynta ha ka ‘tender’ kaba sdang da ka jingbatai (presentation) shaphang ka jingthmu bad ka rukom treikam jong ki na ka bynta ban ai jingshakri ha ka liang ka koit ka khiah lyngba ka 108 ambulance.
La ong ba ynda kine ki kompani ki la dep ban pyni ïa ki jingbatai jong ki, na ka liang ka Sorkar kan hap ban ai ‘mark’ ïa ki katkum ka jingïahap bad kaei kaba kine ki kompani ki la batai naduh ka jingshemphang jong ki ban pynïaid ïa ki ambulance bad ka rukom ai jingshakri nalor ki bynta kiba dei ban peit ïa ka bha ka miat jong ki nongtrei.
Shuh shuh la ong ba nalor ka jingslem ban pynbna ïa ka jingïoh ‘mark’ jong kine ki kompani kiba ïashim bynta, ka Sorkar ka dang pynslem ruh ban ai jubab sha ki kompani kiba pan jingshai lyngba ki jingkylli.
Kaei ka daw shalyndet ba ka Sorkar ka pynslem wat ban pynbna ïa ka jingïoh ‘mark’ jong ki kompani ka dei kaba ym lah ban tip. Hynrei ka jingkylli kaba mih ka long, hato ka Sorkar ka salia ban pynbna namar ka artatien ïoh ba ka kum jied da ki kompani ki bym pat biang, bad kan mih ka jingbymhun hapdeng kine ki kompani kiba wan ïashim bynta ha ka ‘tender’?
Ka Myntri ka koit ka khiah ka Kong Ampareen Lyngdoh ruh kam shym la kwah ban kren halor kane hynrei ka la ong ba ka jingjied kan long ban ïoh ïa kano-kano ka kompani kaba lah ban ai ka jingshakri kaba biang na ka bynta ki paidbah.
Dang ha kine ki sngi, ki don ki khubor kiba la mih haba ïadei bad ki katto-katne ki kompani kiba khlem pat biang satia ha ka jingai jingshakri ha kaba ki la wan ïashim bynta bad ka NHM ruh ka la ai syrnot ïa kawei ka kompani ba ka dei kaba la donbynta ha ki kam ai jingshakri bad ka tnat ka koit ka khiah lyngba ka NHM.
