Shillong, Naiwieng 07
Ka JAC-NEHU ha ka jingïalang kaba la pynlong ha ka 6 tarik Naiwieng ka la kyntait ïa baroh ki jingkynnoh jong u Vice-Chancellor (VC) ka North Eastern Hill University (NEHU) pyrshah ïa ka NEHUTA bad JAC haba ïadei bad ka jingthung kam be-aiñ ïa u Technical Offi-cer/Senior Consultant, u Rohit Prasad ha ka jingïakynduh bad ki lad pathai khubor ha ka 4 tarik mynta u bnai.
“Ngi la kyntait ïa man la iwei-pa-iwei i jingkdew jong u ha ka jingïakynduh bad ki lad pathai khubor kaba long ka jingleh khyllung-khynnah khlem kano-kano ka nongrim bad kaba lamler suda. Ka nongrim jong ngi ka long kaba skhem halor ka jingpynkheiñ ïa ka UGC Model CRR (Cadre Recruitment Rules) kaba long ka mat kaba kongsan eh,” la ong ki nongïalam ka JAC ha ka kyrwoh khubor.
Ka JAC ka pynkynmaw ruh ba u VC u pyrshang ban ïada ïa ka bym lah ban pynshisha.
Ha kajuh ka por, ki nongïalam ki la ong ba ka jingthung be-aiñ ïa u Rohit kam don kano-kano ka jingkyrshan da kano-kano ka kyndon jong ka NEHU bad ka dei ka jingpynkheiñ ïa ka UGC Model CRR.
Kum shi bynta ban pynshai ha ryngkat ki kot ki sla kum ka jingpynshisha sha ki lad pathai khubor bad ki paid nongshong shnong ka Jylla, ka JAC kan sa pynlong ïa ka jingïakynduh bad ki lad pathai khubor ha ka 8 tarik mynta u bnai ha Shillong Press Club ha ka por 3:30 baje mynsngi ban thad madan ïa u VC.
“Ngin thad madan ruh ïa u VC halor kiwei-kiwei ki jingpynkheiñ kiba u la leh naduh ba u la shong ha ka shuki jong u VC ha NEHU ha kine ki 2 snem tam ba la dep,” la ong ka kyrwoh na ki nongïalam ka JAC.
Na ka liang ka komiti ka la kyrpad ruh ïa baroh kito kiba don ka jingsngewkhia bad ki kam jong ka NEHU ban ïadonlang ban tip ïa ka jingshisha.
U VC ka NEHU, u Prof. Prabha Shankar Shukla ha ka Sngi Saitjaiñ u la kam ba u Technical Officer/Senior Consultant, u Rohit Prasad u la shah thung da kaba bud ïa baroh ki kyndon bad ba un ym leh kano-kano kaba bakla da kaba shah jem ha ka jingpynbor na ka North-Eastern Hill University Teachers’ Association (NEHUTA).
