Shillong, Naiwieng 07
U President ka Hill State People’s Democratic Party (HSPSP), Bah KP Pangniang, u la ong ba ka jingïalang hapdeng ka United Democratic Party (UDP) bad ka HSPDP hapoh ka lama jong ka Regional Democratic Alliance (RDA) kaba la long ha ka Sngi Ba-ar ka long kaba sngewtynnnad ha kaba ki la ïoh ban ïakren halor ki bynta bad ki kam kiba kongsan eh kiba ïadei bad ka jingpynkhlaiñ ïa ka RDA.
Haba kren sha ki lad pathai khubor hadien ka jingïalang ka RDA kaba la long ha ka shlem treikam jong ka UDP ha Laitumkhrah kaba don hajan ka Shillong College, u Bah KP Pangniang u la ïathuh ba ha katei ka jingïalang ki la ïakren ruh ha kaba ïadei bad ka jingpynkhreh jong kitei ki artylli ki seng ïa ka MP ilekshon hapoh ka shatri jong ka RDA. Hynrei ha kaba ïadei pat bad ka jingïatreilang jong kitei ki artylli ki seng ha ka MDC ilekshon kam pat don satia kano-kano ka jingïakren.
“Ha ka jingïalang kaba la long mynta ka sngi, ngi la rai ba ngin sa pyntip sha baroh ki dkhot jong ka HSPDP bad ka UDP ba ngin pynkhlaiñ biang ïa ka RDA bad ngin ïakren ruh ïa ka jingpynkhreh ïa ka MP ilekshon da kaba ngin don bad ïakren ïa kane ha la ki jong ki jingïalang hapoh ki seng jong ngi”, la ong u Bah Pangniang.
U Bah Pangniang u la ong ba ka RDA kam pat ïakren eiei ha kaba ïadei pat bad ka ilekshon MDC, hynrei ha ki ilekshon kiba la dep pat la ïohi ba kine ki artylli ki seng ki la don ka jingïasngewthuh bad ka jingïajan hapdeng jong ki.
“Ha ka ilekshon MDC ka ban sa wan, ngin sa ïakren sani bha ha kine ki ban sa wan”, la ong u Bah Pangniang.
Haba kylli la hato u kyrtong ka RDA na ka bynta ka MP ilekshon un dei na ka seng UDP, u Bah KP Pangniang u la ong ba lada u dei u kyrtong na ka seng UDP ne ka seng HSPDP ruh kampher, hynrei kum ka kynhun RDA kan ïakren bad shim lang ïa kajuh ka rai.
“Ngi la ïakren shai bha ba namar ba ngi don hapoh ka shatri jong ka RDA, uno-uno u kyrtong la u dei na ka seng HSPDP ne na ka seng UDP, ngin wan shakhmat ha ka jingïalang jong ka RDA bad ngin sa shim lang ïa ka rai, ngim don kano-kano ka jingsngewpher ha kaba ïadei bad ka shap ne u kyrtong hynrei lada ka seng UDP ka don ïa u kyrtong uba tbit na ka bynta ka MP ilekshon, ngin ailad ïa ka ba kan pyntip hapoh ka RDA bad ngin sa shim pat ïa ka rai”, la ong u Bah Pangniang.
U Bah Pangniang u la ong ba ha kaba ïadei bad u kyrtong na ka bynta ka MP ilekshon, ka UDP kan tyrwa ïa ki kyrteng jong ki kyrtong kiba ka thmu ban pynïeng bad ka HSPDP ruh kan leh ïa kajuh ka bynta.
