Aizawl, Naiwieng 07 (UNI)
Ka jingthep ‘vote’ ban jied ïa ki 40 ngut ki dkhot ka Ïingdorbar Thawaiñ ha Mizoram ka la long ha ka Sngi Ba-Ar ha kaba ki nongthep ‘vote’ kiba la wan poi ki long 74.82%.
Watla ka por thep ‘vote’ ka dei haduh 4 baje janmiet, hynrei ki dang don bun ki nongthep ‘vote’ kiba dang ïeng laiñ ban ïoh jied ïa ki nongthawaiñ ka jylla.
U Additional Chief Electoral Officer ka Mizoram, u H. Lianzela, u la ong ba haduh 4 baje janmiet, ka jingwan ki nongthep ‘vote’ ka long 74.82% bad kane ka lah ban kiew sha ka 80% namar ka jingthep ‘vote’ ka dang ïaid ha kiba bun ki Polling Station.
U la ïathuh ruh ba ka ilekshon ka la long kaba ïaid beit khlem don kano-kano ka jingjia lane ka huri-hura ha ki 1,276 tylli ki Polling Station ha kylleng ka jylla.
U Myntri Rangbah bad nongïalam ka Mizo National Front (MNF), u Zoramthanga, u la thep ‘vote’ ha Ramhlun Venglai hadien ka por 9 baje mynstep. Ka jingthep ‘vote’ jong u Zoramthanga ha ka banyngkong ka la pulom namar ka jingthut ha ka kor EVM. Une u nongïalam u la pynpaw ba ka MNF kan jop kumba 25 tylli ki konstitwensi.
U nongïalam ka seng Congress, u Lal Thanhawla, uba la long kum u Myntri Rangbah la san sien, u la leit thep ‘vote’ ha Zarkawt. U Lal Thanhawla, 85 snem ka rta, u la khlem ïakhun satia ha kane ka kynti bad ka long ka sien banyngkong ba u khlem ïakhun ilekshon ha ki 45 snem.
Ha Mizoram, ki don 8,56,868 ngut ki nongthep ‘vote’ katba ki nongïakhun ilekshon ki don haduh 170 ngut. Ka jingñiew ïa ki ‘vote’ kan long ha ka 3 tarik Nohprah.
Ha u snem 2018, ka MNF ka la jop 26 tylli ki konstitwensi katba ZPM ka la jop 8 tylli, Congress 5 tylli bad BJP kawei.
