Shillong, Naiwieng 07
Kawei ka dur-khih ne video ka la saphriang kylleng kylleng ha kaba la ïohi ba ki don bun ngut ki briew kiba leit ïalum shajan ki kynthei kiba la ai sop-sop ïa ki jingsong sha kita ki briew, bad kane ka la pynlong ïa ki pulit ka nongbah Shillong ban tohkit bad wad ïa kine ki briew ban ïoh kem.
Haba kylli na u SP (City), Bah Vivek Syiem shaphang kane ka dur-khih, u la ong ba ka jingtohkit ka dang ïaid bad dang thwet ïa kine ki briew ban ïoh kem.
Halor ka jingkylli la ka don ne em ka jingsuba ba kine ki briew ki dei kiba die drok, u SP (City) u la ong ba kaei kaba paw bad ïohi ha ka dur-khih ka pyni ba ki dei kiba donbynta ha kine ki kam, tangba ka jingtohkit ka dang ïaid ban lap ïa ka jingshisha.
Ha ka dur-khih, la ïohi ba ki don bun ngut ki shynrang kiba leit ïaboi ïa ki kynthei ha kawei ka lynti kaba la antad ka dei mar pyrshah bad ka Bhutia Market harum jong ka lad ban leit sha Them Metor. La ïohi ba kine ki kynthei ki ai sop-sop sha ki shynrang ïa ki kynja jingsong kiba la suba jur ba ki dei kiba la song ïa u drok.
