Jowai, Naiwieng:
Ka Greta Solutions Training Academy kaba don ha Newhill Loomsooiung, Jowai lyngba ka jingkyrshan ka Meghalaya State Skills Development Society (MSSDS) jong ka tnat Labour ka sorkar Meghalaya ka la plie ïa ka jinghikai ïa ki samla ha ka kam shet Cake ne Craft Bakery.
Ha kane ka jingai jinghikai la don 30 ngut ki samla na kylleng ka West Jaiñtia Hills District kumjuh na East Jaiñtia Hills District ki ban shah pyntbit ha ka kam shet Cake na ka bynta lai bnai kynthih.
Ïa kane ka jingai jinghikai la plie da u Deputy Commissioner ka West Jaiñtia Hills District u Bah BS Sohliya ha ka jingdonlang u Bah FG Syngkon Functional Manager DCIC, West Jaiñtia Hills District, u Skill Development Officer West Jaiñtia Hills District u Bah Lambormi Suchen.
U Deputy Commissioner u la ong, ha ka jingïaid lynti jong u kum u DC jong ka West Jaiñtia Hills District, u shem ba ki samla ka West Jaiñtia Hills ki long kiba minot bad don ka mynsiem trei shitom.
U la ong kajuk mynta kam dei shuh ka juk kaba suk ban ïoh kam ïoh jam hynrei hap ban ïaksaid bad leh hi dalade ïalade kumno ban ïeng ha la ki kjat la jong ban kamai na bynta ïalade bad ïa ka ïing ka sem.
U la kyntu ïa ki 30 ngut ki samla ba kin minot bad tista ban wan sha ki jingai jinghikai bad ban pynleit jingmut bad lada don kano kano jingeh bad bym sngewthuh long kiba kloi ban kylli jingkylli.
U la kyntu ruh ïa kiwei ki samla shynrang bad kynthei ba kin wan shakhmat ban shah pyntbit ha kiba bun ki jait jinghikai ba la mang kyrpang na bynta jong ki.
U Bah FG Syngkon Functional Manager DCIC, West Jaintia Hills District, u la batai lyngkot shaphang ka skhim Prime Minister Employment Generation Programme (PMEGP) kaba dei ka skhim jong ka sorkar pdeng bad na kane ka skhim ka ai ïa ka subsidy kaba haduh 35% bad ka jingïarap kan wan lyngba ka DCIC.
U la kyntu ïa ki samla ba ynda ki la pyndep ïa kane ka jinghikai ban wan sha ophis DCIC ban ïaleh ne aplai ïa ka PMEGP namar kane ka skhim ka ai jingïarap ïa kito kiba kwah ban ïeng ha la ki kjat la jong.
U Bah Lambormi Suchen, u la ong ha West Jaiñtia Hills District haduh mynta la lah ban pyntbit kumba 600 tam ki samla. Na kine 400 tam dei kiba la lah ban seng kam lajong bad haba kheiñ kyllum ïa ka jingïoh ne ka jingmih ka jong ki, ka la kot sha ka 24 lak tyngka shibnai.
