Shillong, Naiwieng 08
Ka jingkieng ïaid kali kaba don halor jong jaka ba den ïa ka pung Umïam bad kaba la donkam ban bujli noh ïa ki ‘bearing’ kiba don shapoh, mynta ka dang ap ïa ka rai jong ka Sorkar Jylla ha shwa ban pyntrei noh.
Ka tyllong khubor ka ïathuh ba ki jingpynkhreh ki la ïaid hynrei donkam ban ai rai ka Sorkar na ka bynta ban pyntrei namar kam dei ka kam kaba suk ban pyntrei khamtam ban khyllie ïa ki bynta jong ka jingkieng na ka bynta ban thep bujli ïa ki bearing.
“Ka dei ka kam kaba shitom bha kaba ym lah ban shu leh kyrkieh, hynrei donkam ban da leh sani namar kam long kaba suk ban khyllie kawei-pa-kawei ka bynta jong kane ka jingkieng ban sei ïa ki bearing kiba rim bad ban thep da ki bearing kiba thymmai,” la ong ka tyllong khubor.
Kane ka kam dei kaba donkam ban leh da ki briew kiba shemphang bad don jingtip na ka bynta ka jingshngaiñ ha ka por ba pyntrei bad hadien ba la dep ban thep da ki bearing kiba thymmai hapoh jong kane ka jingkieng.
“Ka dei ka kam kaba hap ban leh beit kata, ban bujli noh ïa ki bearing kiba rim na ka bynta ka jingshngaiñ jong ka jaka ba den ïa ka pung Umïam khnang ba ka jingkieng kan nym ban khia ïa ka jaka ba den ïa ka pung,” la bynrap ka tyllong khubor.
