Shillong, Naiwieng 08
Ka jingpyrshah ban pynkut ïa ka tamasa Cherry Blossom ha ka 19 tarik u Naiwieng 2023 kaba dei ka Sngi U Blei ka la wanrah ïa shibun ki jingpyrshah na ki kynhun bapher bapher kiba kynthup ïa ki sengbhalang, ki kynhun balang bad ki seng saiñ hima ruh kiba la mih shakhmat ban pyrshah ïa kane ka jingpynkut ïa katei ka tamasa.
Kum ban shu kdew hangne ka sorkar jylla kan sa pynlong ïa katei ka tamasa naduh ka 17 tarik haduh ka 19 tarik u Naiwieng, 2023 ka ban pynlong ha madan Kurkalang Bhoirymbong.
Na ka liang u nongmihkhmat ka thaiñ Ri Bhoi na Mawhati Constituency, u Bah Charles Marngar u la mih shakhmat ban pynpaw ïa ka jingbym sngewïahap ïa ka tarik ban pynkut ïa ka Cherry Blossom kaba ka sorkar ka pynbna kaba dei ka Sngi U Blei. U Bah Charles u la ong ba kum u nongïalam u da sngewkthang haduh katta katta ban ïohi ba na ka liang jong ka sorkar ka la pynbeit ïa katei ka prokram ban pynkut ha ka Sngi U Blei.
“Ka jingkylli mynta ka long, balei ym lah ban pynlong ha kiwei ki sngi? Ym don sngi shuh ban pynlong ha kiwei ki sngi?”, la buh jingkylli u Bah Charles.
U Bah Charles u la ong ruh ba ym tang ka tamasa Cherry Blossom hynrei ki la don sa kiwei pat ki prokram ha kaba na ka liang jong ka sorkar ki pdiang ban pynlong ha ka Sngi U Blei da kaba pynkynmaw ba ha ka 15 tarik u Risaw 2023 kaba hap ha ka Sngi U Blei, u Myntri ka sorkar pdeng u la wan ban ïuhkjat hapoh ka Ri Bhoi District ha kaba la pyntip lut sha baroh ki khlieh nongsynshar distrik ba ki hap ban wan trei ha ka Sngi U Blei.
U Bah Charles u la pynkynmaw ruh sa ïa kawei ka jingjia kaba la jia ha ka 30 tarik u Naitung kaba hap ha ka Sngi U Blei ha kaba u lamphrang jong ka Lok Sabha u la wan hapoh ka jylla. Ïa katei ruh ka jingkynduh lang la pynlong hapoh ka ïingdorbar thawaiñ bad na ka liang u Myntri Rangbahduh ka ri ruh, u Narendra Modi u la wan shapoh ka jylla ha ka Sngi U Blei ban pynlong ïa ka prokram kaba ym ju kham ïohi koit ha ki por kiba la dep.
“Ka long kaei kaei kaba sngewsih bad nga kren ïa kane da kaba burom, nga burom ïa kiwei ki jait niam ruh ki bym dei ki khristan bad kiwei kiwei ruh hynrei ngi im ha ka jylla bad ha ka ri ha kaba ngi hap ban ïa burom iwei ïa iwei”, la ong u Bah Charles.
U Bah Charles u la ong ba la ïohi ba ka jinglong jingman kumba ka long mynta hapoh ka jylla, ka dei namar ba kum ki nongïalam hapoh ka jylla ki jem palat bad lada wan kano-kano ka prokram napoh ka sorkar pdeng bad nawei nawei, la ailad katkum ka prokram ba ki la buh bad pdiang beit. U Bah Charles u la ong kum u nongïalam shimet um sngewïahap satia ban pynlong bad pynkut ïa ka tamasa Cherry Blossom ha ka Sngi U Blei bad wat la na ka liang ka sorkar ka la rai ban pynkynriah noh ïa ka por pynlong ïa katei ka tamasa sha ka 3 baje janmiet hadien ba la wai ki jingïaseng. Pynban na ka liang u Bah Charles u la ong ba halor kata ruh ym sngewïahap satia namar ba ka dang dei hi ka Sngi U Blei.
“Nga pynsngew sha ka sorkar ba kum uwei na ki nongïalam, nga sngew pyrshah ïa kane bad ngam sngewïahap bad nga kyrpad ruh ïa ka sorkar ba kim dei ban pynlong kano-kano ka prokram ha ka Sngi U Blei ym tang kane ka prokram kaba mynta hynrei nangne shakhmat ruh ki dei ban burom lem”, la kubur u Bah Charles.
