Shillong, Naiwieng:
U tyngshop ba pawnam jong ka Bollywood u Rajkumar Rao ha ka Sngi Ba-ar u la ïoh ban plie ïa ka dukan bam kaba la tip kum ka Cherry Bean Café, ha kaba yn ïoh ïa ki jingbam kiba phylla bad shet bang.
Kane ka dukan Cherry Bean Café ka don ha Khyndailad, Shillong bad ka dei kaba la long trai da u Agnish Paul. U Rajkumar Rao u dei uba ïashongkha bad ka Patraleka Paul, kaba dei nangne na nongbah Shillong.
U Rao u la pynpaw ïa ka jingkmen ban ïadon ryngkat ha ka jingplie ïa kane ka Café kaba thymmai, ha kaba yn sa ïoh ïa ki jingbam jingdih kiba kham phylla bad kiba bang na kane ka dukan.
U la ong ba ka Cherry Bean Cafe ka don ruh ïa ka jaka kaba biang na bynta baroh ki nongbam, ka jaka ban shongthait, ban ïakren ïakhana bad ki paralok bad ka jaka ban ïoh ban treikam treijam ha ryngkat bad ka jingbam ïa ki bam kiba bang bad ban pynsngewtynnad ruh lyngba ki jingtem jingput.
Ha kane ka cafe yn ïoh ïa ki jingbam kiba bang bad kiba phylla bad khamtam ïa u cheesy burgers, hotdog bad delectable fries kiba ïahap bha ban dih bad ka coffee kaba kyrpang.
“Ka nongbah Shillong ka long kum ka ïing ba-ar ka jong nga, nga sngewieid bha ban wan biang shane. Ngi don ïa kane ka Cafe kaba itynnad bha mynta bad ngi kwah ba baroh ki briew, ki nongshong shnong jong ka jylla bad ki nongjngohkai pyrthei ban wan sha kane ka Cafe ban lehkmen,” la ong u Rajkumar Rao.
