Shillong, Naiwieng:
Wat la u Bah Amazing Kurbah u dei uba la paw ha ka jingtbit kum u nongïalap ilekshon ha Sohïong konstitwensi, hynrei mynta pat u la kylla long u tyngshop ha ki phlim Khasi bad ïa ka phlim kaba u la ak kaba la ai kyrteng ‘Rai-eh’ ki paidbah kin sa ïohi ha ka Khasi National Dorbar Hall Mawkhar, Shillong naduh ka 27 tarik mynta Naiwieng haduh 2 tarik Nohprah, 2023.
Ïa kane ka phlim la pynwandur da u Bah Kit Rina Nongrum bad u Bah Amazing Kurbah u la shah jied ban long kum u tyngshop bad u Kynsai Lynshiang bad ka Meda Basaïawmoit ka la shim kum ka puron lamkhmat kaba ki paidbah ki tip kum ka Kongbih ha ki serial ba la pyllait ha Youtube channel Kit rina Nongrum.
Ka por ban pyni ïa kane ka phlim ka long 11:30 mynstep, 2:00 baje nohphai sngi, 5:00 baje janmiet bad 7 baje mynmiet.
Ka ban pynshongshit shuh shuh ïa ki paidbah ynda la pyni ïa kane ka phlim ka long ba u Bah Amazing Kurbah u la shim ïa ka bynta ban shoh ïa ka lok lajong (ka Meda).
Haba ïakren bad ka Meda Basaïawmoit ka la ïathuh ba u Bah Amazing u long u briew uba jai-jai, tangba ha ka phlim Rai-eh u la shoh ïa ka haduh ba kan da sngewsih.
Ka la ïathuh ba u Bah Amazing u tbit shisha ban ak phlim wat la baroh ar ngut ki dei kiba nyngkong ban mih hakhmat ka Camera.
“Ha kaba nyngkong nga la kyiuh ban ak lang bad u Bah Amazing namar u dei uba la paw ha ka jingïalap ilekshon ha Sohïong hynrei ngam poi pyrkhat ynda ngi la ïakynduh u long u briew uba pariah bad ba sngewtynnad bha” ka la ong.
Kumta ka la kyrpad ïa ki paidbah ba kin wan ban ai jingkyrshan ïa ka phlim ‘Rai-eh’ ha Mawkhar khnang ban ai mynsiem ïa ki nongïashimbynta.
Kum ban shu kdew, ïa ka phlim ‘Rai-eh’ la dep ïoh syrnod na Guwahati. Kane ka phlim ïa mynta ka dang ap pali ha Bijou Cinema, hynrei namar la sngewthuh ba kane ka phlim kan dang slem ban pyni, kumta u trai jong kane ka phlim u la leit pyni noh shwa tang shi taïew ha Mawkhar.
