Shillong, Naiwieng 08
Ka National SC-ST Hub (NSSH) ka la lap ba ki duna bha ki nongseng kam na Meghalaya kiba shim ïa ki lad jingmyntoi kiba wan lyngba ka tnat Micro, Small, and Medium Enterprises (MSME).
Haba kren sha ki lad pathai khubor ha ka Sngi Balang, ka Mercy Epao kaba dei ka Joint Secretary ka tnat MSME ka Sorkar Pdeng ka la ong ba ka jingthmu jong ka NSSH ka long ban wan ïalap khnang sha Meghalaya na ka bynta ban pynsngewthuh sha baroh kiba kwah ban seng kam namarba ki don shibun ki lad jingmyntoi kiba wan lyngba ka tnat MSME kiba long ka jingmyntoi bad kyntiew ïa ka ïoh ka kot.
Ka la ong ba ki nongseng kam lane ‘entrepreneur’ na Meghalaya kiba dei ki SC bad ST, kiba ïoh myntoi na ki skhim kiba wan lyngba ka MSME ki dang duna bha bad ki dang don tang kumba 600 ngut.
Kane ka jingwan ki briew na ka tnat MSME sha Meghalaya ban batai ka dei namarba ka tnat MSME kan pynlong ïa ka jingïakynduh lang kaba tip kum ka NSSH Mega Conclave ka ban pynlong ha State Convention Centre, Shillong ha ka Sngi Palei.
Ki briew kiba don bynta bad ka NSSH kaba don ïa ka shlem treikam ha Guwahati, ki la batai ba ka MSME ka don ka bynta kaba khraw haba ïadei bad ka jinglah ban ai kam ai jam bad pynbha ïa ka rukom im bad ka jingïoh kamai ki nongshong shnong kaba ïarap ban kyntiew ïa ka ïoh ka kot.
U Vijay Prakash uba dei u Zonal Manager (North East) ka National Small Industries Corporation Ltd, u la ong ba ka tnat MSME jong ka Sorkar Pdeng ka la pyntreikam khnang ïa ka National SC-ST Hub (NSSH) scheme da ka jingthmu ban kham pynbha ïa ka jinglah jong ki nongseng kam kiba dei ki SC bad ST bad ban kham pynkupbor ïa ki ban ïoh ïashimbynta haba ïadei bad ka jingthied ïa ki tiar ki tar bad ban leh ïa kata katkum ka jingbuhthong kaba long 4% ka jingthied ïa ki tiar na ki SC/ST enterprise.
