Shillong, Ïaïong 25
Ïa ka jingïalang kaba saw jong ka Task Force na ka bynta ka jingkyntiew ïa ki kam jngoh kai ha ka thaiñ Shatei Lam Mihngi la pynlong ha New Delhi ha ka Sngi Palei.
Ha kane ka jingïalang la ïadonlang ki heh sorkar na baroh ki jylla ka thaiñ Shatei Lam Mihngi – Assam, Arunachal Pradesh, Meghalaya, Manipur, Mizoram, Nagaland, Sikkim bad Tripura. Kiwei kiwei kiba la ïadon bynta ha kane ka kam ki long ka NITI Aayog, tnat Civil Aviation, Micro, Small & Medium Enterprise, Textiles, Kam Jngoh kai, tnat Deiriti, Tnat Information & Broadcasting jong ka Sorkar Pdeng bad ki kynhun shimet.
Ka Task Force ka la ïamir jingmut ïa ki rukom treikam bad ki sienjam na ka bynta ka jingkyntiew ïa ki kam jngoh kai kiba ïaineh ha ka thaiñ Shatei Lam Mihngi lyngba ka jingïatreilang bad kito kiba don bynta ha kane ka kam kynthup ïa ki kynhun bad ki riew shimet.
Lah ban pynkynmaw ha kaba ïadei bad ki rai ba la shim ha ka jingïalang jong ka Consultative Committee jong ka tnat Development of North Eastern Region (DoNER) ha u Nailur, 2022, la tyrwa ban thung ïa ka Task Force na ka bynta ka jingkyntiew ïa ki kam jngoh kai ha ka thaiñ Shatei Lam Mihngi.
Kumta la thung ïa ka Task Force ha ka 20 tarik Risaw, 2023 hapoh ka tnat DoNER ryngkat ki dkhot na ki tnat Sorkar Pdeng, Sorkar Jylla bad kiwei kiwei kiba don bynta ha kane ka kam.
