UK, Jylliew:
Ka UK kan pynbiang ïa u uranium sha ka Ukraine na ka bynta ki jaka pynmih bor ding nuclear jongka bad kan pynjari ïa ki jingpynjari ba thymmai pyrshah ïa ka Russia, ong u Myntri Rangbahduh katei ka ri, u Keir Starmer, ha shwa ka jingïalang jong ka G7 summit ha ka Sngi Ba-ar.
Haba kynthoh ïa ki “jinghiar thma ba shyrkhei” jong ka Russia pyrshah ïa ka Ukraine, ka UK ka pynpaw ïa ka jingpynrem kaba jur da kaba khang ïa ki khajna kiba pynmih ïa ka thma jong u Putin bad ai bor ïa ka Ukraine lyngba ki lyiur kiba dang wan, ka ophis jong u ka la sot ïa ka jingkren jong u Starmer, haba kdew ïa u President ka Russia, u Vladimir Putin.
U President jong ka Ukraine, U Volodymyr Zelensky, u dei ban leit sha ka jingialang jong ki hynñiew tylli ki ri kiba pawkhmat ha ka pyrthei, ha ka nongbah jngohkai pyrthei jong ka France, ha Evian-les-Bains, ha ka Sngi Ba-ar, ha kaba ki paralok kiba iatreilang, ki wad ban pynkhih ïa ka jinglong jingman, ha ka liang jong ka Kyiv, hadien saw snem tam jong ka thma.
Ka jingmih jongu ka long hadien ba ka jingbthei namding jong ka Russia ha ka step jong ka Sngi Nyngkong ka la pyniap ym duna ïa ka 11 ngut ki briew ha kylleng ka Ukraine bad ka la pynmih ïa ka ding ha kawei na ki iing mane blei Orthodox ba kongsan tam ha ka nongbah.
Ka ophis jong u Starmer ka la ong ba ka jingiateh bording kan “ai bor ïa ka Ukraine ha ki ar snem ban wan”.
U Myntri rangbahduh jong ka ri Bilat — hapoh ka jingpynbor ha la iing hadien ba u myntri kam pohiing jong u u la risaiñ ha ka jingiakynad halor ka jingpynlut ha ka kam shipai ha ka taiew ba la dep — un iathuh ha ki nongialam ha ka jingialang ba “ka G7 ka dei ban iatreilang ban iaid shakhmat ban pynthikna ba ka Ukraine kan ioh ïa ka jingsuk kaba hok bad kaba neh kaba ka dei hok ban ioh”.
“Ngin ieng bad ka Ukraine katba ka shim por bad kane ka jingpynbna ka pynskhem ïa kata”, la ong u Starmer.
Katkum ka jingbuh jingkheiñ, la ong ruh ba Kumba £210 million ($282 million) ka pisa ban shalan shabar ri kan ailad ïa ka Urenco kaba don ha UK ban pynbiang ïa u uranium ba la pynriewspah sha ka Energoatom kaba pynmih bor ding nuclear jong ka Ukraine.
Ki jingpynjari thymmai “kin pynduhjait ïa ka jingpyrshang thma jong ka Russia ha ki bynta bapher bapher” da kaba thmu ïa ki liengsuiñ ba be-aiñ jong ka Russia bad ki lad ai pisa ba la pyndonkam ban ïaid lait ïa ki jingpynjari, la ong ka ophis jong u Starmer.
