Kharkiv, Jylliew:
Katkum ki khubor, la ong ba kawei ka drone jong ka Russia, ka la leit bthei ha kawei jaka ri mrad ‘Zoo’ jong ka nongbah Kharkiv jong ka Ukraine, ha kaba katto katne tylli ki khnai rabit ki la iap bad bun tylli kiwei pat ki jait mrad ki la shah ktah na katei ka jingjia ha ka Sngi Nynkong.
Ki nongmudui jong ka nongbah Kharkiv kaba sha ka thaiñ mihngi jong ka Ukraine, ki iathuh ba katei ka drone, ka la leit hap bad pynbthei ïalade ha ka jaka, kaba la buh kyrpang kum ka jaka ri mrad, ha kaba la buh da ki spah tylli ki khnai rabit, ki sniang Guinea, ki jait khnai ba pher bad kiwei de ki jait mrad ba kham rit. Ka kyrwoh na ka Telegram ka iathuh ba 10 tylli ki rabbit ki la shah pyniap bad 15 tylli pat ki la mynsaw ha katei ka jingjia.
Shuh shuh ruh la ong ba uwei u hati u la shah ktah hadien katei ka jingshah thombor kaba la pynjulor ïa ka bynta ba shabar jong ka jingker kaba don marjan bad u.
Hynrei la iathuh ba ym shym la don kano- kano ka jingjia ba sngewsih hapdeng ki nongtrei ne ki nongwan jngohkai kiba don ha katei ka jaka, ha katei ka sngi.
Nalor kata, la ong ba kawei ka “eco park” kaba don shabar jong ka nongbah Kharkiv ka la shah thombor ha ka Russia ha kaba sdang jong une u snem bad ki nongtrei ki la iathuh ha katei ka por ba katto katne tylli ki sim ki la shah pyniap.
Ka Kharkiv, kaba jngai kumba 30 Km (18 mile) na u pud u sam jong ka Russia, ka dei ka jaka ba ju shah thombor ha ki Russia ha katei ka thma kaba la neh palat saw snem.
