Chennai, ïaïong:
U kyrtong uba ïakhun ïa ka ilekshon Lok Sabha na Tirunelveli u Nainar Nagendran u la ong ba un sa leit mih hakhmat ki pulit ka Tamil Nadu ha ka 2 tarik, Jymmang ha kaba ïadei bad ka mukotduma jong ka jingïoh kurup ïa ka pisa kaba T. 4 klur na ka rel ha ka por ba la don ka jing-leit ïalap ilekshon hajan Chennai.
Ha ka jingïakren bad ki nongthoh khubor, u Nainar Nagendran u la ong ba kane ka pisa kam dei ka jong u bad pynshisha da kaba ong ba ki pulit ka jylla ki lah ban pynngat ïa u ha ka aiñ da ka jingphla jong u briew uba la shahkem uba la rah ïa ka pisa.
U Nainar Nagendran u la ong, “Nga la shu shah thombor. Ka kyrteng jong nga ka la shah kynthup ha ka mukotduma jong ka jingïoh ban kurup ïa ka pisa kaba T.4 klur namar ka jingïasuhbuit sniew ha ka kam saiñ pyrthei. Ngam don bynta ei ei bad kane ka pisa. Naba la don ka jingïoh ban kurup ïa ka pisa kaba palat T. 200 klur na kylleng ka jylla, ka jingpyntreikam pyrshah pat ka la long tang na ka bynta ka T. 4 klur ba la ïoh ban kurup ha kaba kane ka la long tang ka jingsuba. Ha kaba ïadei bad ka jingïoh ban kurup ïa ka pisa kaba T. 4 klur, ka la don ka jingsuba ba uba la shah kynnoh u la shah byrngem byrsit. Ki pulit ki la hukum ïa nga ba ngan leit mih hakhmat jong ki ha ka 2 tarik, Jymmang. Ngan sa leit ban mih hakhmat jong ki khlem pep. Ïa ki jingtip ba bniah ba balei ki la khot hajir ïa nga yn sa tip hadien ka jingleit mih jong nga hakhmat jong ki. Ka jingpyndonkam ban pynmih ïa ka kyrteng jong nga ha kaba ïadei bad kane ka jingïoh ban kurup ïa ka pisa ka dei ka jingïoh ei halor ki jingpynbna na ka bynta jong nga,” la ong u Nagendran ha ka jingïakren bad ki nongthoh khubor.
