Lucknow, Risaw:
Ha ka sienjam kaba thmu hashwa ka elekshon Legislative Council ka ban wan ha ki Teacher bad Graduate konstitwensi ha Uttar Pradesh, ka Samajwadi Party ha ka sngi Saitjaiñ ka la pynïeng arngut ki dkhot pyrshah jong ka seng BJP kum ki kyrtong jong ka hadien ba ka la pynrung ïa ki sha ka seng, kaba bujli ïa ki kyrtong jong ka seng kiba la pynbna kham hashwa.
U heh ka seng SP u Akhilesh Yadav u la jied ïa u Sanjayan Tripathi uba la mih na ka BJP kum u kyrtong jong ka seng na Gorakhpur-Faizabad Teachers konstitwensi bad ai ïa ka tiket na ka bynta ka Agra Graduates konstitwensi sha u Akash Agarwal uba shong MLC uba la jop kum u riew shimet hynrei u dei u nongïakhun ïa ka tiket BJP ha kane ka kynti.
Ka seng SP ka la weng noh ïa ka tiket jong u Ram Prakash Gupta uba la pynbna kham mynshwa kum u kyrtong jong ka na Agra Division ban pynsah ïa u Akash Agarwal.
Ki nongïalam ka seng ki la rai ban pynïeng ïa u Akash Agarwal namar ka jingkyrshan kaba jur jong u hapdeng ki nonghikai bad ha ka kyrdan jong ka thaiñ. U Agarwal u la pan tiket na ka BJP kaba bat ïa ka jingsynshar.
Ryngkat bad ka Agra, ka seng ka la bujli ruh ïa u kyrtong ha Gorakhpur-Faizabad Division, ha kaba la bujli ïa u Kamlesh Yadav da u Dr Sanjayan Tripathi kum u kyrtong bathymmai jong ka.
Ïa kane ka jingleh la ïohi kum ka jingpyrshang jong ka seng pyrshah ban pyndonkam ïa ka jingbym sngewhun hapdeng ki kyrtong kiba la shah iehnoh beiñ ha ka BJP bad ban pynjur ïa ka jingiakhun ha ka elekshon MLC.
Ka elekshon sha ki san tylli ki Graduates konstitwensi bad hynriew tylli ki Teachers konstitwensi jong ka Uttar Pradesh Legislature Council kan long ha ka 23 tarik, Risaw, ha kaba ka jingñiew vote kan long ha ka 27 tarik, Risaw.
Haba ïakren bad ki lad pathai khubor ha ophis ka seng ha Lucknow ha ka sngi Saitjaiñ, u heh ka seng SP u Akhilesh Yadav u la ong, “Ngi la rai da ka jingmynjur bad ka jingïatreilang jong ki arngut ki paralok kiba la long ki kyrtong SP barim ba u Dr Akash Agarwal bad u Dr Sanjayan Tripathi kin long ki kyrtong ban ïakhun ha kane ka elekshon MLC ban wan.”
