Mumbai, Risaw:
Ka kynhun synrop Mahayuti, ka la pynkut noh ïa ka rukom ïasam ïa ka shuki kaba 3:1:1 na ka bynta ka elekshon kaba man la ar snem sha ka Ïingdorbar Thawaiñ jong ka Maharashtra, ha kaba ka jingthep vote kan long ha ka 23 tarik u Risaw, 2026, bad ban ñiew vote ha ka 27 tarik u Risaw.
Katkum ka jingïathuh ki nongïalam ka Mahayuti, ka BJP kan ïakhun lai tylli na ki san tylli ki seat kata ka Pune Graduate, ka Pune Teacher bad ka Nagpur Teacher konstitwensi.
Ka NCP kan ïakhun na ka Sambhaji Nagar Graduate konstitwensi, katba ka Shiv Sena kan ïakhun na ka Amravati Teacher konstitwensi.
Kham hashwa, ka NCP bad ka Shiv Sena, ki la buh ïa ka jingdawa ïa ka konstitwensi jong ka Graduate konstwensi ha Pune, hynrei ka BJP, ka la kyntait ban ailad ïa ka.
U Ravindra Chavan, president ka BJP ka jylla Maharashtra, u la ong ba ka BJP kan ïakhun lai tylli na ki 5 tylli ki seat, kynthup ïa ar tylli na Pune bad kawei na Nagpur.
U la ong ba ka seng ka la jied 5 ngut ki kyrtong na ka bynta kawei kawei ka seat bad la aiti ïa ki kyrteng jong ki sha ka Central Parliamentary Board na ka bynta ban jied.
“Ngi la ai kham bun ki lad ki lynti, kumta ka long kaba eh ban ong mano ban shah jied ne mano ban shah kyntait na ki jingjied”, la ong u Chavan.
Ka Maha Vikas Aghadi (MVA) ka kynhun ba ïasohlang jong ka liang pyrshah ruh ka la pynlong ïa ka jingïalang ban pynkut noh ïa ka jingpynbeit ïa ka jingïasam shuki jong ka, hynrei kam shym la lah ban poi sha ka jingïasngewthuh jingmut.
Ka Congress ka la pyni ïa ka jingsngewtynnad ban ïakhun ïa ki lai tylli ki seat: ka Amravati Teacheri, Nagpur Graduate bad ka Pune Teacher konstitwensi. Ka Shiv Sena bad ka NCP-SP kin ïakhun mar kawei ka seat.
Hynrei ka NCP-SP bad ka Shiv Sena baroh ar ki kwah ban ïakhun ïa ka Sambhaji Nagar Graduate konstitwensi, kaba la wanrah ïa ka jingsahteng ha kaba ïadei bad ka jingïasam shuki na ka bynta ka elekshon Legislative Council hapoh ka MVA.
