Mumbai, Risaw:
Ki la don kumba 98 ngut ki nongbylla sngi, ba kynthup ïa 30 ngut ki kynthei bad 38 ngut ki khynnah, la ïoh ban pyllait im na ki jaka treikam ba la kynnoh ba ki shah byrngem ha ki jaka pynmih rnga kiba la saphriang ha ki 10 tylli ki jaka ha ka distrik Anantapur ha ka sngi Balang.
Kumba la ïathuh la ong ba ïa kine ki nongtrei, kiba dei na ki longïing kiba wan na Mangaon ha Raigad distrik jong ka Maharashtra, la wanrah ïa ki sha Andhra Pradesh, hadien ba la kular ban ai kam ïa ki, bad la ai pisa shwa ïa ki, kaba naduh T.5,000 haduh T.1 lak tyngka.
Katto katne ki longïing ki la ïathuh ba ki la sah bad trei ha ki jaka pynmih rnga ha ki por kiba naduh ar haduh san snem.
Katei ka jingpyllait im, ka long hadien ka jingpynbna ha ka jylla halor kane, hadien ba la ïathuh ba uwei u nongtrei, u la lait phet na kawei na ki jaka trei, bad leit sha ki heh ba dei khmih ha Maharashtra.
Hadien kane la ïasam ïa ki jingtip bad ki bor synshar ha Andhra Pradesh, kaba la ïalam sha ka jingïatreilang hapdeng kine ki ar tylli ki Jylla, bad ka jingïatrei lang ha Anantapur.
Ki tnad Revenue, Labour, pulit bad Women and Child Development ki la ïashim bynta lang ha kane ka jingleit pyllait im. Ha kane ka sngi la don bynta lang ki ophisar jong ka Mandal Revenue, ki ophisar jong ka Labour bad ka WCD, ki pulit, ki nongsumar bad ki nongtrei ka imlang sahlang. Ki kynthei kiba armet ki don napdeng kiba la shah pyllait im.
Ka bor synshar ka la pynbeit mardor ïa ka jingïarap ha ka liang ka koit ka khiah bad ka bam na ka bynta ki nongtrei hadien ka jingshah sumar.
Katkum ka jingong jong ki nongtrei, ki la trei ha kaba ot ïa ki dieng ‘Pichumukka’, bad bteng ban thang ïa ki dieng haduh lai sngi ban pynmih ïa u rnga. Ki la batai ba katei ka kam ka long kaba eh ïa ka met, bad ki la kynnoh ba kim shym la siew ïa ka bainong kaba biang. La ïathuh ba ïa utei u rnga, la pynpoi sha ki Hotel ha Mumbai.
Ki longïing ki shong ha ki jaka rieh tngen ba la shna kyrpang hajan ki jaka pynmih rnga, ba la shna kham bun da ki dieng bad ki jaiñ, bad ki tiar ïing kiba duna bha. Ki nongtrei ki la kynnoh ba la khanglad ïa ka jingleit jingwan jong ki, bad ba la shah ïa ki ban leit sha ka shnong kaba jan tam tang shisien shi taïew ban thied ïa u khaw rashon, bunsien na kawei ka dukan.
Katto katne ngut ki nongtrei ki la kynnoh ruh ba ki la shah thombor ha ka met, ka jingkren beiñ, bad ka jingbyrngem haba ki kylli ïa ka bainong lane pan jingbit ban leit phai sha Maharashtra.
U Sakaram, uba 40 snem ka rta, u la kynnoh ba u la sah ha ka jingshah byrngem haduh san snem, bad u la shah thombor da ki lathi.
U Hari, uba 45 snem ka rta, u la pynpaw ba u la trei haduh lai snem, bad u la shah thombor da ki sandal bad ki tnat dieng ba don shiah. U la kynnoh ruh ba wat hapdeng ka jingai pisa lypa kumba 5 hajar hynrei la bthah ïa u ban siew 50 hajar ban leit noh.
Ki nongtrei ki la kynnoh shuh shuh ba la kular ïa ki longïing ban ai T.160 shi pla dewïong hynrei ki ïoh tang T.600-T.800 shi taïew na ka bynta ki marbam, katba ka jingsiew pat ka dang sah khlem pynbeit. Ki la kynnoh ruh ba ym shym la don ki por trei ba la buh, bad ba la byrngem haba la pynslem ïa ka kam, lane la dawa bainong.
