Patna, Risaw:
Ka sorkar Bihar, ka la pynkhlaiñ ïa ki kam ai jingïarap bad pyllait im, ha ki jaka ba shah ktah ha ka jingshlei um, namar ba ka jinglong jingman, ka dang long kaba shyrkhei, hadien ka jingjur jong u slap ha Nepal bad ka jingpyllait ïa ka um, kaba bun bha na ka wah Gandak, kaba la ktah ïa ki hynriew tylli ki distrik.
Kumba 4.93 lak ngut ki briew ki la shah ktah ha West Champaran, East Champaran, Gopalganj, Saran, Muzaffarpur bad Darbhanga.
Ki wah kiba heh, kynthup ïa ka wah Ganga, Gandak bad Kosi, ki tuid palat ïa ka dak jingma ha ki katto katne ki jaka.
U Samrat Choudhary, Myntri Rangbah ka Bihar, u la bthah ïa ka tnad pynïaid ïa ki jingjia ba sngewsih, ba ki dei ban pynthikna ba ki lad jingïarap kin poi sha ki briew kiba la shah ktah ha ka jingshlei um ha Saran distrik.
Ki liengsuiñ jong ka IAF ki dang pynhap ïa ki marbam sha suiñ, katba u Choudhary pat u dang buddien ïa ki kam ai jingïarap bad jingpyllait im na ka ophis treikam jong u.
Katkum ka jingpyntip jong ka ophis jong u Myntri Rangbah, palat 28 ton ki marbam, kiba kynthup ïa palat 5,600 tylli ki dong jingbam rkhiang, la pynhap da ka liengsuiñ ha ki jaka ba shah ktah ha ka jingshlei um jong ka Saran.
La pynhap ruh ïa ki jingpynbiang ha ki shnong kiba jngai kiba la shah ker tawiar da ka um kaba la shlei.
Ki liengsuiñ jong ka IAF ki dang pynkynriah ruh ïa ki briew na ki shnong kiba shah ktah sha ki jaka kiba kham shngaiñ.
La bthah ïa ki heh sorkar ha ki distrik ba shah ktah ban pynjur ïa ka jingpahara miet ha ki rud wah hadien ba la don ki jingpynkheiñ ha ki katto katne ki jaka.
U Vijay Kumar Chaudhary, uba bat ruh ïa ka tnad umbam umdih, u la ong ba ka jingjur slap ha Nepal ka la pynlong ïa ka wah Gandak ban nang heh.
Ki jingtip ba dang shen na ki Satellite, u la ong, ki pyni ïa ka jingjur jong ka jingshlei um ha Bihar.
Haba kdew ïa ka kaiphod jong ka NASA Earth Observatory, u Chaudhary u la ong ba u slap uba jur hapdeng ka 24 bad 27 tarik u Nailur ha ki thaiñ lum jong ka Nepal, ka Lumbini bad Gandaki, ka la wanrah ïa ka jingtwa khyndew bad pynlong ïa ka wah Gandak, kaba la tip kum ka Narayani ha Nepal, ba kan shlei ha ki katto katne ki jaka.
Ha kajuh ka por, ki dkhot jong ka kynhun ki briew kiba don ïa ka jinglong kynthei bad shynrang ki la ïasoh bad ki seng trei mon sngewbha, kiba sam ïa ki lad jingïarap sha ki longïing kiba shah ktah ha ka jingshlei um, kiba pynlong jaka sah ha ki kynroh um ha West Champaran, ha kaba ka jingshah tap ka Gandak ha ka um, ka la pynlong ïa ki spah ngut ki briew ba kin phet shnong.
Da ka jingshlei um ha ki ïing ki sem jong ki, da ki spah tylli ki longïing ki la leit ban pynlong jaka rieh ha ki kynroh ba la ker ïa ka wah Champaran bad kiwei kiwei ki jingtei ba la pynkiew ha ka Nautan block.
Katto katne ki longïing ki pynlut ïa la ka sngi bad ka miet ha ki ïingjaiñ ba shipor. Ka jingshlei um ka la pynjot ïa ki ïing ki sem bad pynduh ïa ki longïing longsem ïa ka kamai kajih jong ki, kaba la nang pynjur shuh shuh ïa ki jingeh jong ki.
Ki dkhot jong ka kynhun ki briew ba don ïa ka jinglong kynthei bad shynrang, ba la tip kum ka Khushi Kinnar, Krishna Kinnar bad Panditain Kinnar, ki la sam ïa ki lad jingïarap sha ki jaka sah jong ki lanot ha Bankatwa bad Mangalpur kiba don ha Nautan bad ki la ïakynduh bad ki longïing kiba la shah ktah.
“Ngi ju leit jngoh ïa kine ki longiing ha ka por lehkmen bad ngi ïoh jingkyrshan shibun na ki, mynta ba ki ïakynduh jingeh, ka dei ka kamram jong ngi ban ïarap ïa ki”, la ong ka Khushi Kinnar.
