Chennai, Risaw:
U President ka Tamil Nadu Congress Committee (TNCC) u Manickam Tagore ha ka sngi Saitjaiñ u la ong ba ka kynhun Tamilaga Vettri Kazhagam (TVK) ba la ïalam da u Vijay ka la pynïasoh ïalade bad ka INDIA block, ha kaba u la kdew ïa kane kum ka “sngi kaba don histori”.
Ki nongïalam jong ka TVK, u Aadhav Arjuna bad ka Maria Wilson, ki la leit sha ka jingïalang jong ka INDIA bloc, kaba la long hapoh ka jingïalam jong u Tagore, ha ka ophis jong ka TNCC ha Chennai, ha kaba ki seng kiba ïashim bynta, ki la dawa ban iehnoh kam ïa u Chief Election Commissioner (CEC), u Gyanesh Kumar.
Ki seng kiba la ïashim bynta ha kane ka jingïalang ki long ka Congress, TVK, CPM, CPI, VCK, MDMK bad IUML.
Haba kren sha ki nongthoh khubor, u Tagore u la ong, “…Ka TVK ba la ïalam da u Vijay ka la pynïasoh bad ka kynhun synrop jong ka INDIA. Ka dei ka sngi kaba don histori bha na ka bynta ka kynhun synrop jong ka INDIA. Ka kynhun jong ka INDIA, khamtam ha Tamil Nadu, ka dei ban nang khlaiñ shuh shuh da ka jingwan rung jong ka TVK. Kane ka pyni ba ka jingïakhun pyrshah ïa ka RSS-BJP, khamtam ka jingbym lah synshar jong u Modi bad u Amit Shah, ka dang ïai bteng ruh ha Tamil Nadu.”
