New Delhi, Risaw:
Kum shi bynta ban khanglad ïa ki jingnang jur jong ki jingïakhih, la pynsangeh treikam ïa ka mobile internet ha kylleng ka Jantar Mantar ha ka sngi Thohdieng, namar ba ki pulit jong ka nongbah Delhi, ki la kem ïa kumba 500 ngut ki nongïakhih, kiba dawa ban iehnoh kam ïa u Chief Election Commissioner, u Gyanesh Kumar. Kiba la bat ki kynthup ïa ki nongïalam jong ka AAP bad ki nongïakhih jong ki katto katne ki seng jong ki samla pule.
La pynsangeh noh ïa ka Internet ha katei ka jaka ba pynlong ïa ka jingïakhih bad ha ki jaka ba marjan.
Katkum ka khubor, kane ka jingpynsangeh ka treikam naduh ka por 9 baje mynstep haduh ka por 9 baje mynstep hapoh ka jingjngai kaba 1.5 km radius na Jantar Mantar. Ki pulit kim shym la shim jingtip ban pynthikna ïa kita ki kynta kiba thikna ha ki kaiphod kiba don.
Ka Delhi Metro ka la khang ïa ka rung ka mih ha ki 12 tylli ki steshon, napdeng jong kitei ki kynthup ïa ka Rajiv Chowk, Central Secretariat bad Jantar Mantar.
Ki pulit ki la ïathuh ba la thaw haduh 8 haduh 9 tylli ki zone hapoh Jantar Mantar bad sawdong jong ki, kawei kawei hapoh u heh ophisar jong ka IPS. Ha kane ka sngi la pyntreikam ruh ïa ki shipai jong ka Rapid Action Force bad kawei ka kali ban tehlakam ïa ki jingkulmar. U DCP ka New Delhi u Sachin Sharma u la ong ba ka kyndon 163 jong ka BNSS ka treikam ha katei ka distrik, bad ym shah ban pynlong ïa ki jingïakhih, jingïakynad bad jingïaid paidbah.
Ki pulit jong ka Delhi ki la ïathuh ba la kyntait ïa ka jingbit ban pynlong ïa katei ka jingïakhih. Ki pulit ki la pynbna ba katei ka jingïalang ka long kaba be-aiñ bad ki la weng noh ïa ki nongïakhih na katei ka jaka.
Ki nongïalam ka AAP, kiba kynthup ïa u Saurabh Bharadwaj, u Sanjeev Jha, ka Atishi bad u Sanjay Singh, ki dei kiba la shah kem. La kem ruh ïa ki nongïakhih jong ka AISA, SFI, NSUI bad kiwei kiwei ki kynhun jong ki samla pule.
Ka tyllong khubor na ki pulit ka la ïathuh ba kumba 700 ngut ki dkhot ka SFI kiba la pyrshang ban poi sha Jantar Mantar la pynsangeh ha ka lynti ïaid kjat jong ka surok Ashoka, bad bun ki la shah set hangtei. Uwei u heh pulit u la buh ïa ka jingkheiñ baroh kumba 500 ngut. Ka jingkheiñ kaba kham mynshwa ka long kumba 150 ngut.
Ki nongïakhih ki kwah ba u Kumar un hiar shuki halor ka jingkynnoh ba don ki jingleh bym hok ha ka Special Intensive Revision (SIR) jong ka thup kyrteng thep vote bad ka jingpyndam ïa ki nongthep vote. Ki la pynpaw ruh ïa ka jingsngewkhia halor ka hok thep vote.
U Bharadwaj jong ka AAP u la ong ba ka seng ka pyndonkam ïa ka hok synshar paidbah jong ka ban pynpaw ïa ki jingeh. U la kdew ba katto katne ki jaka ïeng metro ki la khang bad u la kyrpad ïa ki briew ban pyndonkam ïa ka jaka ïeng metro kaba plie kaba jan tam bad ban ïaid kjat sha katei ka jaka lada lah.
Ka General Secretary ka SFI ka Aishe Ghosh ka la ong ba la kem katto katne ngut ki nongïakhih jong ka SFI bad ka DYFI. Ka la kynnoh ba ki pulit kim shym la lah ban khanglad ïa ki kam runar ha ka nongbah katba ki la mih da ka bor ban ïada ïa u Kumar.
Ka jingbat ïa ki nongïakhih kan ym pynkut noh ïa ka jingïakhih, ka la ong bad bynrap ba kane ka dei tang ka jingsdang.
