Gaza, Iaïong:
Ka United Nations ha kane ka kynti ka la kren shaphang ka jinglong-jingman bad ka jingshah ktah jur jong ka Gaza na ka jingleit hiar thma jong ka Israel bad kumta ruh ka UN ka la ong ba lada yn pynkhuid bad pynwan-dur biang ia ka Gaza kumba ka dei ban long baroh shi katta kan shim por kumno-kumno kumba 14 snem. Wat la katta, la ong ba kitei ki 14 snem kin long tang ban shu pynkhuid bad weng shwa ia kito ki kynrum-kynram kiba la twa bad julor na ka jingther bom ba khlem sangeh jong ki shipai ka Israel ha kine ki sngi.
Namar la ong ba ka jingleit hiar thma bad ka jingpynjulor jong ki shipai ka Israel ia ki bynta ka sawdong- sawkun jong ka Gaza, ka la pynum bad pyn madan lajan baroh ki bynta jong katei ka nongbah kaba don ia kumba 2.3 Million ngut ki paidbah nongshong shnong.
U heh ka United Nations Mine Action Service (UNMAS), u Pehr Lodhammar, haba ai jingkren hapoh Geneva, u la iathuh ba ka thma hapoh Gaza ka la pynmih palat 37 Million Ton ki lyng-khot-lyngkhai kiba julor na ki ïing mala kiba heh bad na ki jingtei kiba don ha kylleng sawdong jong ka nongbah Gaza.
Utei u heh u la ong ruh ba wat la ym pat lah ban buh jingkheiñ thik- pa-thik hynrei katkum ka jingpeit thuh la antad beit ba kan shim por kumba 14 snem tam eiei ban pynkhuid ia baroh ki kynrum-kynram bad ki lyngkhot-lyngkhai kiba la kylla dpei na ki iing ki sem kiba don ha katei ka nongbah.
Namar la ong ba ka lehnoh Hamas ka la leit thombor ia ka Israel ha ka 7 tarik u Risaw mynshem snem, ha kaba palat 1,200 tam ki nong Israel ki la duh ei ia ka jingim ha katei ka por. Dei naduh katei ka sngi hi ba ka Israel ka la rai ban kput ia katei ka kynhun lehnoh ba shyrkhei jong ka Palestine bad ka Israel ka la smai ba kan pynduh jait noh syndon ia katei ka kynhun lehnoh ha kane ka sien namar lada sangeh noh ia ka thma, kan long ka jingailad ia kitei ki lehnoh ba kin nang ioh bor bad kin nang pyntbit shuh-shuh ialade bad ki lah ban thombor biang ia ka Israel bad ia kiwei ruh ki ri ba marjan hadien- habud. Kumta, la ong ba kane ka long ka jingma kaba khraw lada pyllait ia ka Hamas bad lada yn sangeh noh ia ka thma ha kum kane ka por.
Haba iadei pat bad ka jingleit hiar thma bad ka jing kput jong ka Israel ia ka Gaza Strip, palat 34,305 ngut ki nong Palestine ki la duh ei noh ia ka jingim jongki hapdeng katei ka thma jong ka Hamas bad ki shipai Israel. Katba, 77,293 ngut pat ki dei kiba la mynsaw bad shah ktah ha katei ka thma.
