Washington, Nailar:
U President ka United States, u Donald Trump, ha ka Sngi Thohdieng jong kane ka taiew ba la dep, u la ong ba ka India bad ka Pakistan, ki dap da ka jingbitar, ka jingkhuslai bad ka jingkulmar ha ka por ba ka US ka la pynjari da ki khajna ïa ki mar khaïi jong kitei ki ri, ha ki por jong ka Operation Sindoor ha u snem ba la dep, ha kaba, u la ong ba dei ka America kaba la lah ban pyniasuk ïa ka jingiakynad hapdeng kitei ki arliang ri ha katei ka por ka thma.
Watla katta, la ong ba ka India, haduh mynta ruh kam shym la pdiang ne mynjur ïa katei ka jingpynbna jong u Trump na ka por- sha ka por ba ka dei ka US kaba la pyniasuk ïa katei ka thma hapdeng ka India bad Pakistan. Namar na ka liang jong ka India hi, ka pynpaw beit ba dei ka Pakistan kaba la kynran dieh noh da lade hi, hadien ba ka sngewthuh ba kam kot bor ban ïa aireng bad ka India ha katei ka thma kaba la neng kumba katto- katne taïew.
Haba ai jingkren sha ki nongthoh khubor ha katei ka sngi hapoh Camp David, u Trump u la ong ba ka US ka la lah ban pyniasuk ïa kiba bun tylli ki thma ha kylleng ka pyrthei naduh ba u la ioh ban shimti hi ma u, ïa ka shuki President jong ka America. U la kdew ruh ïa ïa ka jingiakren iasuk hapdeng u President ka Russia- u Vladimir Putin bad u President ka Ukraine- u Volodymyr Zelensky ha shwa ba un phai khmat noh pat sa sha ki thaiñ South jong ka Asia.
