Idaho, Nailar:
Katkum ka video ba la ioh ring dur da uwei u nongñiah kali na kylleng ki bynta jong katei ka surok, la iohi ïa uwei u nongsiat uba la iohi ba u phong da ki jaiñ rong iong baroh shi rynïeng.
Kane ka la jia ha kawei ka dukan bam burger ‘In-N-Out’ kaba don ha ka thaiñ South jong ka nongbah Idaho ha ka Sngi Saitjaiñ, ha kaba bun ngut ki la mynsaw na katei ka jingjia bad don ruh kiba la duh noh syndon ïa la ka jingim.
Hynrei napdeng jong kitei kiba la khlad noh, la kynthup lang ïa utei u nongsiat hi katkum kaj ingpynithuh jong u heh pulit ka tnat Twin Falls, u Matthew Hicks. Watla katta, la ong ba ki pulit ki dang ialeh ban bud-dien halor katei ka jingjia bad ban pynithuh pura bad ban pyntikna ruh ïa ka jinglong- jingman bad ka jingthmu jong utei u nongsiat ha katei ka jingjia.
“Ngi ngeit ba ka jingma ïa ka imlang sahlang kam don shuh,” la ong u Hicks. U la bynrap ruh ba um pat tip tikna ïa ka jingdon jong katno ngut kiba la khlad ne mynsaw na katei ka jingjia baroh bad ki heh sorkar ki dang don ha ka jingpyntip sha kiba haïing- hasem jong kitei kiba khlad baroh.
Ha shwa ka jingialang bad ki nongthohkhubor, U Brent Reinke, U Commissioner jong ka Twin Falls County, u la ong ba u Sheriff Jack Johnson u la iathuh ha u ba ki don phra ngut ki briew kiba la mynsaw.
U Lane Koehn, 34 snem ka rta, u iathuh ba u don ha ka jaka kaba paw shai bha hajan ka In-N-Out, haba u iohi ïa uwei u briew, uba don ïa ka suloi AR-style, ba u mih na ka jaka iaid kali. Uwei u briew uba don ka pistol u la sdang ban siat ïa utei u nongsiat.
Nangta u la iohi ïa uwei uba phong ïa ka jaiñ trei ‘In-N-Out’ ba u tan ïa kawei ka samla, kaba phong ruh ïa kajuh ka jaiñ ba ju phong ki nongtrei jong katei ka dukan bam, kaba la khah snam namar ka jingshah ksam ha ki kuli sha shiliang ka jaka ieng kali. U nongtrei, u Koehn bad u briew uba don ïa ka pistol ki la ap lang ïa ka haduh ba ki nongsumar kin poi na ka bynta jong ka.
U Koehn u la ong ba la bthah ïa u da ki pulit ban pynkynriah namar ba ka jingshah siat ka dang iaid shakhmat. U la ong ruh ba u nongsiat u la siat ym duna ïa ka lai ne saw tylli ki kuli bad ym shym la lah ban tip la don ne em ki briew kyrpang kiba la shah thombor.
Ka video ba la ioh ring da uwei u nongñiah kali na shiliang surok, ha kaba la iohi ïa uwei u nongsiat, u ba riam iong, u ba ïaid shajan kawei ka kali lieh ha ryngkat ka suloi kaba jrong, katba u dang plie ïa ka jingkhang ba sha ka liang jong u nongñiah bad u pynpait ïa ka bynta ba shadien jong katei ka kali. Nangta, utei u briew u la iaid shadien jong katei ka kali bad u la rung shapoh. Ha kata ka por u nongniah kali uba la ring ïa ka video u la phet noh kloi namar ka jingsheptieng ioh ba utei u briew u lah ban sei shuh- shuh ïa ki tiar siat.
Ka nongshong shnong jong ka Twin Falls, ka Haley Dodaro, kaba 43 snem ka rta bad ka kmie jong ka, ki la leit sha In-N-Out ban bam ja miet ha ka sngi Saitjain. Katba ki dang ap ha ka lain jong ki kali, ki la iohi ïa ki briew kiba ïa mareh sha shiliang surok bad ki nongtrei kiba la bolt shabar na ka jaka bam. Ha kaba nyngkong u Dodaro u la pyrkhat ba ka lah ban don ka ding, hynrei nangta uwei u briew uba pyniaid ïa ki kali ha ka vest kaba pynshai u la ong ba don u nongsiat.
Ka jingshah siat ka la jia hajan ka jaka die jingbam ‘burger’ kaba bun briew bha bad da ki spah ngut ki briew ki ieng laiñ hangtei ha kata ka por, la ong u Hicks. Ki pulit ki la kylli jingkylli ïa ki nongsakhi bad ki la kyrpad ïa kino kino kiba don jingtip ban iakynduh ïa ki bor pyniaid.
Ka In-N-Out ka la plie tang kumba shi taiew shwa, ha ka 24 tarik u Naitung, kum shi bynta jong ka jingpynheh jong ka kompeni dang shen sha Idaho.
