Washington, Nailar:
Uwei u khynnah uba dang 14 snem ka rta na Montana, u la ioh ïa ka jingiaroh kaba jur hadien ba u la pyndonkam da ki buit jong u ban ioh pyllait im ïa uwei u briew uba la shah rah ha ka um kaba tuid stet na ka wah ha ka por ba ma u bad ka iing jong u ki dang ïa leit sah kai pynngat sha katei ka jaka. Bad la ong ba katei ka jingkloi jong u ka la iarap ban pyllait im ïa utei u briew na katei ka jingma kaba khraw kaba ap ïa ka jingim jong u lada dei ba un sahkut sah ha katei ka wah khlem ka kano- kano ka jingïarap.
U Jory Thomas, u dang leit sah kai shipor baroh shi iing, hajan Greycliff, kumba 70 mer shaphang Sepngi na Billings, ha ka sngi kut taiew jong ka Fourth of Naitung.
Ha ka 5 tarik u Naitung, u la iohsngew ïa ka sur ba khot pyrta jingïarap na ka wah Yellowstone kaba don hajan jong katei ka jaka ba ki sah ha i iing dara.
La ong ba katei ka lieng ka la kum leit tynrah ïa u rishot jong ka jingkieng ha katei ka wah, ha kaba, saw ngut ki briew kiba shong ha ka, ki la sied shapoh jong katei ka wah. 3 ngut ki la lah ban poi sha ryngket, hynrei uwei u briew u la shah rong noh shapoh wah katba u dang pyrshang ban ïakhun ban poi sha ryngkew.
U Jory u la ong ba ka jingtuid jong ka wah ka long kaba stet bha bad utei u briew u la shah rah ha katei ka um kaba tuid stet bha. U la iathuh ruh ba tang kawei kaba u lah ban pynleit jingmut ka long ba u dei ban ioh pyllait im beit ïa utei u briew namar um kwah ban iohi ba uno- uno ruh un ngam ne ïap jyllop ha khmat jong u.
Kumta la ong ba utei u khynnah, u la pyn thylli ïa ki pla jong u baroh, u la shim da ki tiar kiba u lah ban ioh najan jong katei ka jaka ba u don bad u la shim ïa u tyllai bad mareh bud ïa utei u briew uba la shah rah ha ka um narud- narud jong ka wah haduh ba un da poi ha ka jaka ba utei u briew u sahkut. Nangta u la pynhap ïa u tyllai sha utei u briew.
U Jory u la ong ba u la donbok ban ioh pynpoi ïa utei u tyllai sha utei u briew tang ha ka sien pyrshang kaba nyngkong jong u.
Hadien kata, la ong ba u la pyrshang ban tan suki- suki ïa utei u briew lyngba ka um kaba la tap ïa u haduh ryndang haduh ba ki nongiarap ba nyngkong kin da leit poi sha katei ka jaka bad ki la ioh ban iarap tan ban pyllait im ïa utei u briew na katei ka jingjia.
Ha ka 21 tarik u Naitung, u Sheriff ka Sweet Grass County u Alan Ronneberg bad u Undersheriff u Ron Swanson ki la ai ïa ka Certificate of Achievement ïa u Jory halor ki kam jong u, ong ka ophis jong u Sheriff ha ka Facebook.
Hadien kata ha ka 27 tarik u Naitung, u Senator ka Montana u Steve Daines u la ithuh ïa u Jory kum u Montanan of the Month bad u la ai ïa ka jingthoh kum ka jingburom ïa u na ka bynta ka Congress Record.
Ha ka kyrwoh, u Daines u la ong ba u Jory u pyni ïa ka jingpyrkhat kaba stet bad u shong shngain hapoh ka jingpynbor da ka jingshlur kaba palat jngai ïa ki snem jong u. U la bynrap ruh ba ki paralok bad kiba haïing hasem jong u Jory ki ong ba u la ju long uba sbun bad uba ïarap bad ba u dei u nongmuna ba shisha jong ka mynsiem Montana.
