Aizawl, ïaïong:
Ka Mizoram ka la paw mynta ba ka la long ka jylla kaba la shah ktah jur na ka jingpang khieshoh ha ka ri bad ki la don kumba 13 ngut ki briew kiba la ïap namar ka jingsaphriang jong kane ka jingpang ha u snem 2023, la ïathuh ki heh jong ka tnat ka koit ka khiah ha kine ki khyndiat sngi.
Ïa kane ka jingïohlum jingkheiñ halor ka jingbun jong kiba la shah ktah ha ka jingpang, la pynbna ha ka por ba don ka World Malaria Day ba la rakhe ha Aizawl ha ka sngi Palei mynshem taïew.
U Dr. Eric Zomawia, uba long u Mission Director jong ka National Health Mission (NHM) ha ka jingai jingkren jong u, u la ong ba ki la don baroh kumba 18,005 ngut ki briew kiba la shah ktah na ka jingpang khieshoh na palat 3 lak ngut kiba la shah shim snam na ka bynta ban khmih bniah halor ka jingpang ha u snem 2023.
Na ki 18,005 ngut kine ki nongpang, 13 ngut ki la khlad noh hapdeng u Kyllalyngkot bad u Nohprah jong u snem ba la lah, u la ong.
U la ong ba ka Mizoram ka la paw ba la don kumba 76 per cent ka jingkiew ha kaba ïadei bad ka jingdon jong ki briew kiba la ïoh ïa ka jingpang khieshoh ha u snem 2023 haba ïanujor bad ki snem ba la leit kata ha u 2022.
Ki la don kumba 1,776 ngut ki briew ïa kiba la shah pynshisha haduh mynta ba ki la shah ktah ha ka jingpang khieshoh hapdeng u bnai Kyllalyngkot bad u Rymphang jong une u snem, u la ong.
Ym shym la ïoh jingtip ban don kiba la ïap hadien ka jingshah ktah ha ka jingpang haduh mynta ha une u snem 2024.
U la ong shuh shuh ba ka Mizoram mynta kala paw ha ka jingdon bun tam ki briew kiba la shah ktah ha ka jingpang khieshoh ha kaba ka la kiew da 1,000 ngut haba ïanujor bad kiwei pat ki jylla ha ka ri.
Ka Lawngtlai distrik kaba don ha ka bynta ba shaphang Shathie jong ka Mizoram ka la long ka jaka ba bun tam ki briew ba shah ktah ha ka jingpang ha kaba ka la long da 56.18 per cent, ha kaba la bud sa ka Mamit distrik da 33.30 per cent.
