![Shah jied 2 ngut ki khynnah U-13 ka PFR Football Academy sha ka Selection Trial ha Mumbai 9d2f91e1-f5d8-4707-9826-2d3](https://unongsainhima.com/wp-content/uploads/2024/04/9d2f91e1-f5d8-4707-9826-2d3-720x428.jpg)
Shillong, Ïaïong 28
Ar ngut ki khynnah jong ka jylla kata u Mebanpynshngain Khyriem bad u Mangpaka Nongkynrih kiba long ki khynnah jong ka PFR Football Academy Shillong, ki la shah jied na Meghalaya sha ka U-13 Final Selection Trial jong ka Reliance Foundation Young Champ ka ban long ha Navi kaba don hapoh ka nongbah Mumbai, Maharashtra naduh 3 tarik haduh 7 tarik Jymmang 2024.
Napdeng ki 25 ngut ki khynnah jong ka jylla kiba la poi sha ka wat khatduh jong ka Meghalaya Zone, u Mebanpynshngain Khyriem bad u Mangpaka Nongkynrih ki long ar ngut ki khynnah kiba la shah jied napoh Meghalaya Zone ban leit sha ka Final Selection Trial jong ka Reliance Foundation Young Champ ha ka U-13 Category kaba long ruh ka jingpyrshang kaba khatduh shwa ba kin ïoh rung shapoh ka Football Camp jong ka Reliance kaba don ha nongbah Mumbai.
Ha kane ka Final Trial, ki don 56 ngut ki khynnah na kylleng ki jylla bapher bapher jong ka ri India kiba la shah jied bad napdeng ki 56 ngut katkum ka jingïoh jingtip, ka long tang 16 ngut ki khynnah jong ka ri kin ïoh ban don hapoh ka National Camp jong ka Reliance Foun-dation Young Champ.
Haba ïakren bad u President jong ka PFR Football Academy u Bah Franky Kharumnuid u la ong, ka Academy ka dap da ka jingsngew kmen kaba khraw hadien ba ka la ïoh ïa ka khubor ba u Mebanpynshngaiñ Khyriem bad u Mangpaka Nong-kynrih kiba long ki khynnah jong ka Academy ki la shah jied napoh ka jylla ban leit ïa ka Final Selection Trial jong ka Reliance Foundation Young Champ ka ban long ha nongbah Mumbai.
U la ong ruh ba kane ka jingshah jied ka jong ki ka dei lyngba ka jingtrei shitom jong ki Coach kata ka Kong Nylla Mery Wahlang bad kumjuh u Bah Tyngshain Kharlyngdoh kiba la lah ban saiñdur ïa ka sap ka phong ka jong ki bad kumjuh ruh ka jingai mynsiem jong ki kmie ki kpa jong ki. U la bynrap ruh ka jingshah jied ka jong ki napoh ka jylla ka long ruh ka jingai mynsiem ïa kiwei ki khynnah kiba don hapoh ka Academy ba kin trei shitom ba kin poi sha kum kane thong.
Na ka liang jong ka Academy ka ai ïa ka jingkitbok kitrwiang ïa u Mebanpynshngain Khyriem bad u Mangpaka Nongkynrih ba kin lah ban pyni ïa ka sap kaba ki don ha kane ka Trial, hooid kam long kaba suk ïa ki ban ïoh rung hapoh ka National Camp jong ka Reliance namar ki hap ban ïakhun ban pyni ïa ka sap jong ki bad ki 56 ngut ki khynnah jong ka ri, hynrei u la ong ba kum ka Academy ka ngeit skhem bad ka kyrmen ba ki khynnah kin lah ban ïalehkai bha ban poi sha ka thong.
Ka Academy ka ainguh nyngkong ruh ïa U Blei uba la plie lad ïa kine ki khynnah namar la ngeit ba kiei kiei baroh ki dei ki jingpynïaid jong U Blei.