Amlarem, Naiwieng 03
Ka LM Amsyrwai BC bad Padu Shnongpdeng ki la khur jingjop ha ka lympung ïalehkai 3rd Division Football League ba la pynïaid da ka Amlarem Sub-Divisional Sports Association (ASSA) ha ka sngi Ba-ar ha Mini Stadium Ladjaplem.
Ha kane ka jingïalehkai, ka LM Amsyrwai ka la pynliem da 4-1 kol ïa ka Rempakhiaw SC Sapator. U Sampul Langshiang (7 & 31) u la thep ar kol, katba ïa kiwei la thep da u Dame Pasyad (23) bad u Dimiyos Langshiang (47). Ka Rempakhiaw SC ka la pynphai kylla shi kol da u Korius Buam (45).
Ha kawei ka jingïalehkai, ka BC Padu Shnongpdeng ka la pynliem noh ïa ka Padu Nongthymmai lyngba ka shi kol ba la thep da u Pynshai Mukhim (42).
Haba phai sha ka jingïalehkai hapdeng ka Kharkhana Tyllilang bad ka Sohkha Shnong ki la ïakhaid da mar 2-2. Ïa ki kol na ka Kharkhana Tyllilang la thep da u Rememberme Khongiong (10) bad u Kyrshem Khyriem (60), katba ïa ka Sohkha Shnong la thep da u Sandyuni Tongper (3) bad u Moon Enria Tongper (16).
