Shillong, Naiwieng 03
Ka jingïakynad ha ka thaiñ Middle East ka la wanrah ka jingktah kaba jur ïa ki jingïalehkai phutbol ha Saudi, ha kaba ïa ka Saudi Pro League (SPL) ka la pynkynriah noh na ka bynta ka taïew ïalehkai kaba 13, hadien ba ïa ka AFC Asian Cup 2027 la pynkynriah la jan shisnem namar ka jingbym shngaiñ ha katei ka ri.
Ka SPL ka la pynbna ïa kane ka rai ha ka sngi Ba-ar, tang ar sngi shwa ban sdang ïa ka taïew ïalehkai, da kaba ong ba kan sa bishar bniah ïa ka ‘calendar’ jong ki jingïalehkai. Ïa ki tarik ba thymmai na ka bynta ki jingïalehkai jong ka league yn sa pynbna ynda la dep ban bishar bniah.
“Kane rai ka la wan kum shi bynta jong ka jingbishar bniah na ka bynta ki lympung ïalehkai Roshn Saudi League (RSL) jong u snem 2026-27, ha kaba ka jingpynkylla ïa ki tarik jong ka Asian Cup ka wanrah ïa ka jingpynkylla kaba kham bun ha ka kalendar ïalehkai phutbol hapoh ka ri,” la ong ka kyrwoh.
Kane ka jingpynkynriah ka long hadien ka rai jong ka AFC ban pynkynriah noh ïa ka lympung ïalehkai Asian Cup, kaba la thmu ban pynlong naduh 7 tarik u Kyllalyngkot haduh ka 5 tarik u Rymphang 2027 sha ka 23 tarik u Nohprah haduh 21 tarik u Kyllalyngkot jong u snem 2028. Ha kane ka lympung, kin don 24 tylli ki kynhun ki ban shim bynta na ki phra tylli ki jaka jong ka Riyadh, Jeddah bad Khobar, hynrei kitei ki jaka kim long shuh kiba shngaiñ na ka daw ka jinglong jingman ha katei ka ri.
Ka jinglong jingman kam long shuh kaba shngaiñ hadien ki jingshah thombor ha katei ka ri, kynthup ïa ka jingshah thombor ha ka kad liengsuiñ jong ka Riyadh ha u bnai ba la lah, ha kaba 12 ngut ki briew ki la ïap bad mynsaw palat 300 ngut.
