Jowai, Naiwieng 03
Ka West Jaiñtia District Sports Associa -tion (WJDSA) ka la rai ban pynsangeh shuwa ïa baroh ki lympung ïalehkai jong kane ka aïom 2026 namar ka jingduna ki nongïalehkai bad ka jingjan ki eksamin jong ki khynnah skul.
Ïa kane ka rai la shim ha ka General Meeting jong ki klob kiba la pynïasoh sha kane ka synjuk, kaba la long ha Iungwalieh Dorbar shnong Tpep Pale ha ka 31 tarik u Risaw.
Katkum ka jingïalang, la rai pynsangeh ïa baroh ki lympung ïalehkai jong u snem 2026 ka dei na ka daw ba bun ki rangïalehkai ki la leit ïalehkai noh sha kiwei pat ki synjuk ïalehkai. Kumta ka shem jingeh ban ïoh ïa ki rangïalehkai ha kane ka kynti namar sa ka por ka la dier palat ban pynlong ïa ki lympung.
Nalor kata, ka por eksamin jong ki khynnah skul ka la jan namar bun ki nongïalehkai jong ki klob ki dangdei ki khynnah skul.
La rai ruh ban pynkhreh ïa ka ‘calendar year’ jong u snem 2027, kaba kynthup ïa baroh ki jingïalehkai ha la ki jong ki kyrdan.
Shuh shuh ka synjuk ka la rai ban pynlong ïa ka AIFF Referee’s Course bad Examination ha ka taïew ba nyngkong jong u Nohprah katkum ba la aibor da ka Meghalaya Football Association.
Halor kane la kyntu ïa ki klob ban phah kumba ar ngut ki dkhot ne ki kyrtong na kawei pa kawei ka klob sha katei ka prokram da kaba ai jingthoh sha u General Secretary ka WJDSA.
