Shillong, Naiwieng 03
Ka lahduh jong ka Shillong Premier League, ka Mawlai SC ka la khur jingjop ha kaba sdang ïa ka SSA Champions Cup 2026, hadien ba ka la lah ban pynliem noh ïa ka Lamlynti FC da 3-0 kol ha ka sngi Ba-ar ha SSA Stadium.
Kane ka nam jop ka la wan urlong lyngba ki kol ba la thep da u Damanbhalang Chyne (21′), Ricky Chyne (27′) bad u Arkibor Makhroh (48′) na ka bynta ban khur ïa ki lai poiñ ha ka Group-A.
Hashwa ban sdang kane ka lympung, na ka liang ki dkhot ka Shillong Sports Association (SSA) hapoh ka jingïalam u Working President Bah Robert Dkhar, ki la khublei kti ban kitbok ïa ki rangïalehkai lem bad ki nongpynïaid.
Watla ka Lamlynti ka la ïoh ban shim wai haduh san ngut ki rangïalehkai, hynrei kum ka kynhun kaba wan ba-ar ha ka Third Division, ka dangdon hapdeng ka jingeh ban ïakhun pyrshah ïa ka lahduh jong ka SPL.
Ïa ka kol kaba nyngkong la thep da u Damanbhalang ha kaba u rangapkol ka Lamlynti u Nister Roy Suting ïa uba la shim wai na ka Langsning, um shym la lah ban pyllait na ka jingshah thep. Ka kol kaba ar lyngba u Ricky, kaba hangne ruh u Nister um shim la lah ban khanglad bad kane ka pyni ïa ka mynsiem ïakhun jong ka Mawlai.
Tang hadien lai minit ba la bteng ïa ka jingïakhun jong ka kylla miet, ka Mawlai ka la pynbud biang sa shi kol lyngba u Arborki bad kane ka la thep umpjah shi syndon ïa ka Lamlynti ha kaba kam shym la lah ban shuh ban pynphai.
Hadien kitei ki lai kol, ka rukom ïalehkai ka Mawlai ka la sdang ban kylla ha kaba ka la ïoh ruh ïa ka kabu ba kan pyndonkam ïa baroh ki san ngut ki rangïalehkai shongben jong ka, kaba long kum shi bynta ka jingplie lad ïa ki ba kin ïoh mih madan hashwa ban kut kane ka jingïakhun.
Ka jingïalehkai jong ka Group-A ha ka sngi Balang kan long hapdeng ka Nongkrem SC kaba wan ba-ar ha ka First Division pyrshah ïa ka lahduh jong ka Second Division, ka Mawpat SC ha ka por 2:30 nohphai sngi.
