New Delhi, ïaïong:
Ka Uttar Pradesh Child Commission ka la ïoh ban pyllait ïa 95 ngut ki khynnah ha ka sngi Balang ïa kiba la shah pynshisha ba ki la shah ïalam be-aiñ ba Bihar sha UP kane ka jingjia ka la nang jur katba nang mih ki sngi ha kaba ka la paw ba ka dei halor ka jingkhaïi ïa ki khynnah.
U Chairperson jong ka Ayodhya Child Welfare Committee (CWC) u Sarvesh Awasthi u la ong ba hadien ba la ïoh jingtip na ka dkhot jong ka UP Child Commission ka Suchitra Chaturvedi, ki dkhot jong ka CWC ki la shim ka jingkitkhlieh na ka bynta ban leit pyllait ïa kine ki khynnah.
“Ha ka por kumba 9 baje mynstep jong katei ka sngi, ka Suchitra Chaturvedi ka la phone bad ong ba na Bihar, ki la don ki khynnah rit ki la shah kit beaiñ sha Saharanpur bad kine ki la don ha Gorakhpur bad kin sa leit sha UP lyngba ka Ayodhya. Ngi la ïoh ban pyllait ïa kine ki khynnah bad kine mynta ki la ïoh ïa ki jingbam bad ki dawai katkum ka jingdonkam jong ki,” la ong u Awasthi ha ka jingïakren bad ki nongthoh khubor.
U Awasthi u la bynrap shuh shuh da kaba ong ba kine ki khynnah kiba la shah pyllait ki dei kiba don ha ka rta kaba 4 snem bad 12 snem.
“Kine ki briew kiba la ïalam ïa kine ki khynnah kim shym don kino kino ki shithi ban sakhi ba ki la ïoh jingbit na ki kmie ki kpa jong kine ki khynnah ban ïalam ïa ki. Kine ki khynnah ki dei kiba dang hapoh ka rta bad kiba bun na ki ki la ïathuh ba kim shym tip na ka jaka aïu ba ki la shah rah. La dep ban ai jingtip shaphang kane ka jingjia sha ki kmie ki kpa jong kine ki khynnah bad yn sa aiti noh sha ki ynda ki la leit shaw ïala kijong ki khun. Ki la don baroh kumba 95 ngut ki khynnah,” u la ong.
Ha ka taïew ba la dep, ka Uttar Pradesh State Child Commission ha Gorakhpur ka la ïoh ban pyllait ïa ka kynhun jong ki khynnah na Bihar, ha kaba la pynshisha ba kine ki la shah phah sha ki Madrasas kiba don ha kylleng ka jylla. Ka kynhun kaba dei khmih ïa ki khynnah rit ka la treikam halor ka jingkyrpad jong ka National Commission for Protection of Child Rights.
U Chairperson jong ka National Commission for Protection Of Child Rights (NCPCR) u Priyank Kanoongo ha ka rynsan phah khubor ha ka X u la ng, “Ki khynnah kiba lui-lui ïa kiba la shah phah sha ki Madrasas ha kiwei pat ki jylla na Bihar ki la shah pyllait ha Gorakhpur da ka jingïarap jong ka Uttar Pradesh State Child Commission da ka hukum jong ka NCPCR. Ka Riti synshar jong ka ri India ka la ai ïa ka hok ban pynnang pynstad ïa baroh ki khynnah.
Ka dei ka rukom ban pynïoh ïa ka hok sha baroh ki khynnah ba kin leit sha skul. Ha kaba ïadei bad kane ka bynta, ka jingrah ïa ki khynnah baduk sha kiwei pat ki jylla bad buh ïa ki ha ki Madrassas na ka bynta ban ïoh lum synñiang ha kaba ïadei bad ka jingmyntoi jong ka niam ka long ka jingpynkheiñ ïa ka kyndon jong ka Riti synshar.”
