Kolkata, ïaïong:
Ha kane ka por ba ka ilekshon Lok Sabha 2024 ka dang ïaid shakhmat, ka Myntri Rangbah jong ka West Bengal ka Mamata Banerjee ka la kynthoh jur ïa ka seng Bharatiya Janata Party (BJP) ha ka sngi U Blei ha kaba ka la ong ba kam ïahap satia ïa u Myntri Rangbahduh ba un kren thok halor shibun kiei kiei, la ïathuh ka tyllong khubor.
“U Myntri Rangbahduh u la ïai bteng ban kren ïa ki kyntien kiba shu thok. Kane kam ïahap ïa u Myntri Rangbahduh, kam long kaba bha. Ka jingmut jingpyrkhat jong u ka long ka bym ïaid beit. Ngam lah ban ong ba tang namar ba u thok nga ruh nga la hap thok lang,” la ong ka Banerjee ha ka jing-ai jingkren jong ka ha ka jingïalang paidbah kaba la long ha Malda kaba don ha West Bengal ha ka sngi U Blei, la ïathuh ka tyllong khubor.
Ka Myntri Rangbah ka la ong ba ym don kano kano ka seng saiñ pyrthei kaba mih ha India ka ban bun tam ki nongtuh kumba ka la long hapoh ka seng BJP.
“Ka seng BJP ka ju ai jingkyrshan tang ïa kiba riewspah bad ka long ka nongpynshit bad nongsuhbuit sniew. Kino kino kiba don shibun ka pisa ki pynïasoh bad ka seng BJP. Lada kim pynïasoh bad ka seng BJP kin sa shah pynibor ha ka kynhun CBI, Income Tax, NIA lane ha ka NSG,” la ong ka Banerjee, kumba la ïathuh da ka lad phah khubor.
Kum shi bynta ban kynthoh jur ïa ka seng BJP halor ka jingbymsiew ïa ka pisa na ka bynta ka skhim MGNREGA, ka heh nongïalam jong ka seng Trinamool Congress (TMC) ka la ong ba ka sorkar jylla ka la hap ban siew hi noh ïa ka pisa.
“Ha kaba ïadei bad kawei pat ka bynta la ong ba kito ki briew kiba duk kiba trei na ka bynta ki 100 sngi kim shym ïoh ïa ka pisa. Hato phi la ïoh ïa ka pisa na ka Panchayat? Kito kiba ïoh ban bat ïa ka Job Card kiba trei na ka bynta ki 100 sngi kim shym la ïoh ïa ka pisa na ka bynta lai snem…Ngi la pynlong ïa ka jingïakhih ha Delhi. Ym u Myntri Rangbahduh ne ki nongtuh jong u, ne ka Panchayat jong u, ka Panchayat Samiti, ne u MLA ki ban siew ïa ka pisa. Ngi la siew ïa ka pisa,” la ong ka Myntri Rangbah.
