Itanagar ïaïong:
Ka Arunachal Pradesh Congress Committee (APCC) ka la dawa ba la dei ban pynlong biang ïa ka jingthep vote ha ki jaka thep vote ha ka 22-Dingsar bad ka 45-Lengi kiba don ha Nacho Assembly konstitwensi kaba hap hapoh ka Upper Subansiri distrik, halor ka jingpynshisha ba kiba bun ki nongthep vote kim shym ïohlad ban ïashim bynta ha ka jingthep vote kum shi bynta jong ka hok jong ki. Ka seng Congress ka la kynnoh ruh ba u Returning Officer (RO), ki Presiding Officers (PO), bad ki kynhun jong ki ha ka 22-Dingsar bad 45-Lengi Polling Stations ki la pynkheiñ ïa ki kyndon jong ka Representation of the People Act, 1951, bad ka Conduct of Election Rules, 1961. Ka APCC ka la dawa ba la dei ban pynshitom tyngeh pyrshah ïa ki bor ba dei khmih bad ban pynlong biang ïa ka ilekshon ha kine ki ar tylli ki jaka thep vote.
Ha ka jingai jingkren ha ka jingïalang bad ki nongthoh khubor ha Itanagar, ka Vice-president jong ka APCC, ka Toko Mina, ka la ong ba la dei ban pynlong biang ïa ka ilekshon ha ki ar tylli ki jaka thep vote ha 45-Lengi bad 22-Dingsa naba ha ka 24 tarik, Ïaïong la sakhi ba ka la don ka jingpynkheiñ ïa ki kyndon. Ka Mina ka la pynshisha da kaba ong ba ki la don tang kumba 185 ngut na ki 319 ngut ki nongthep vote kiba la ïoh jingbit ban leit thep ïa ki vote jong ki ha ka jaka thep vote 22-Dingsar naba ïa ka jingthep vote la khanglad namar ka jingthut treikam jong ka Electronic Voting Machine (EVM), ha kaba la ïohi ba ki la don 235 ngut ki nongthep vote bad ki la don pat tang 185 ngut kiba la don kyrteng.
“Ki bor ba dei khmih ki la ong ba ka kynhun jong kiba la shah pyntreikam ha ka por thep vote kim shym la pyndam noh ïa ka jingdon jong ki briew, ha kaba kane ka la pyni ïa ka jingbym don lut ki nongthep vote. Naba u RO bad ki PO ki la ong hashwa ban pynlong biang ïa ka jingthep vote, ïa ki nongthep vote kiba don ha katei ka jaka la bthah ba ki la dei ban leit phai ïing noh,” ka la bynrap.
Ka Mina ka la ong ruh ba ha kawei pat ka jaka thep vote ha ka 45-Lengi, ha kaba ki INC Polling Agent ki la shah pynshisha ba kim shym la ai jingbit ban thoh ïa ki Serial Number ha ka EVM bad VVPAT. Ka la pynshisha da kaba ong ba ïa ka hok ban thep vote la kyntait ban pynïoh ha kaba ïadei bad ka jingthep vote. Ka Mina ka la pynshisha shuh shuh da kaba ong ba u District Election Officer u la ai jingbit ban thep vote ar sien, ha kaba ïa ki nongthep vote kiba la shah kyntait ban ai thep vote hashwa ki la ïoh jingbit hadien ba kin leit thep vote, ha kaba kane ka la pynlong ban don ka jingpyrshah jur. Ka APCC ka la phah ïa ka thup kyrteng jong ki nongthep vote sha ka Election Commission na ka bynta ka jingkhmih bniah.
Ka APCC ka la dawa ba la dei ban pynlong biang ïa ka jingthep vote bad byrngem ban pynlong da ka jingïakhih kaba jur lada kam long kumba la buh jingdawa. Ka Election Commission ka la hukum ban pynlong biang ïa ka jingthep vote ha ki phra tylli ki jaka thep vote ha Arunachal Pradesh kynthup ha Dingsar bad ha Lengi ha kaba ki la don ki jingthut treikam jong ki EVM bad ka jingpynkheiñ ïa kiba bun ki kyndon ha ka por ba don ka jingthep vote na ka bynta ka ilekshon Lok Sabha bad Assembly ha ka 19 tarik, Ïaïong.
