Shillong, Jymmang 03
Ka Nativity Higher Secondary School ka la ïoh ban bat biang kum ka lahduh ne Overall Team Champion ha ka sien kaba ar ha ka District Level Inter-School Athletic Meet 2024, kaba la poi sha kaba kut ha ka sngi Palei ha Rowell Lyngdoh Stadium kaba ha Mawlangwir.
Kane ka skul ka dei kaba la bat teng ïa ka nam lahduh ha u snem ba la lah. Ha katei ka sngi la ïadon lang iwei na ki nongmareh ba paw jong ka thaiñ, i Kong Kmoiñ Wahlang iba long kum ka kongsan ha kaba i la ïoh ban sakhi ïa ka jingshim bynta jong 584 ngut ki khynnah na ki 23 tylli ki skul jong katei ka thaiñ.
Na ka liang i Kong Kmoiñ, iba la khur jingjop ha ka World 10K Bangalore Marathon jong kiba la 70 snem karta shaneng, i la kyntu ïa ki khynnah ba ki dei ban pynleit jingmut lang ha ki jingpule bad kumjuh ha ki kam ïalehkai. I la bynrap ruh da kaba pynpaw ïa ka jingkongsan ban ïoh ïa ka met kaba koit ba khiah. La ïadon lang ruh ha katei ka sngi da u Additional Superinten -dent of Police Bah B. Kharjana, kumjuh u District Sports Officer Bah Damang Syngkon, u khlur nongmareh barim ka Jylla Bah Binningstar Lyngkhoi bad Bah Swonding Mawl-ong bad kiwei.
Nalor ka Nativity kaba la long ka lahduh ha ka liang ki shynrang bad kynthei, ka Presbyterian Higher Secondary School ka la wan ba-ar ha ka liang ki shynrang bad ka Maha-ram Government Higher Secondary School ka la wan ba-ar ha ka liang ki kynthei.
Ïa ka nam Best Athlete ha ka U-14 ki shynrang la ïohpdiang da u Robertson Marweiñ na ka Nativity HSS, katba ka Lanosha K Syiemiong jong ka JKMP HSS ha ka liang ki kynthei. U Rickyshan Ïawphniaw na ka Mawkyrwat Presbyte-rian Secondary School u la khur ïa ka nam Best Athlete ha ka U-16 ki shynrang bad ka Ibanda-riakor Nongsiej na ka Nativity HSS ha ka liang ki kynthei. Katba ha ka U-18 u Aiborlang Kharjah-rin na ka Tenset SS bad ka Badaphun Nongrem na ka Nativity HSS ki la khur ïa katei ka nam kum u nongïalehkai ba kynsai. Kumjuh ka Tenset ka la khur ïa ka nam lahduh ha ka March Past, katba ka Little Star HSS bad ka Rising SS ki la wan ha ka kyrdan ba-ar bad balai.
Na ka liang ka shlem treikam u DSO kan sa jied ïa ki nongïalehkai kiba kynsai ki ban mihkhmat ïa kane ka district sha ka State Level Inter-School Athletic Meet 2024 ka ban sa long shen ha ka nongbah Shillong.
