Jowai, Jymmang 03
Ka North Liberty Higher Secondary School (NLHSS) ka la rah ïa ka nam ‘Overall Champion’ ha ka District Level Inter School Athletic Meet 2024 ba la pynïaid da ka shlem treikam u District Sports Officer, (DSO), West Jaiñtia Hills ryngkat ka jingïatreilang ka West Jaiñtia District Sports Association (WJDSA).
Kane ka la wan hadien ba ka NLHSS ka la lah ban khur haduh 14 tylli ki takma ksiar, 12 tylli ki takma rupa bad 4 tylli ki rnong bad ka la khur ruh ïa ka nam ‘Best Athlete’ ha ka kyrdan Under-14, U-16 bad U-18 jong ki kynthei.
Kane ka jingïalehkai ka la poi noh sha kaba kut ha ka sngi Thohdieng ha Kiang Nangbah Stadium ha kaba la wan ban pynhap pyrda da u Deputy Commissioner ka West Jaiñtia Hills u Bah B.S Sohliya.
Ïa ka nam Best Discipline Team la ïohpdiang da ka skul On and On English Secondary School kaba na Ummulong.
Ïa ka nam ‘Best Athlete’ jong ka kyrdan Under-14 ha ka liang ki shynrang la ïoh da u Stephan Wakambam Daimary (Advantist HSS) kaba la khur jingjop ha ka Shot-Put, katba ka Iban-E-ti-lut Shylla (North Liberty HSS) ha ka jingïakop mareh kaba 60 mitar.
Ha ka kyrdan Under-16 la khur da u Teilang-mi-i Phawa (Govt. Boys HSS) ha ka jingïakop mareh kaba 2000 mitar bad ka Eladki Ksoo (North Liberty) ha ka jingïakop mareh ba 100 mitar.
Ha ka kyrdan Under-18 la khur da u Iohi-ksan Lyngdoh (Govt. Boys HSS) ha ka jingïakop mareh kaba 100 mitar, katba Deigratia Dan (North Liberty) ha ka jingïakop mareh kaba 100 mitar.
Ïa ka nam ‘Best Team’ ha ka kyrdan ïalehkai Under-14 ki shynrang bad kynthei la ïoh da ka North Liberty kaba la khur haduh 5 tylli ki takma ksiar, 5 ki rupa bad kawei ka takma rnong.
Ha ka kyrdan Under-16 ki shynrang la ïoh ban khur da ka Govt. Boys HSS da kaba khur 5 tylli ki takma ksiar, 3 tylli ki takma rupa bad 2 tylli ki takma rnong. Katba na ka liang ki kynthei la ïoh da ka North Liberty HS School da kaba khur 4 tylli ki takma ksiar, 5 tylli ki takma rupa bad kawei ka takma rnong.
Ha ka kyrdan Under-18 ki shynrang la ïoh da ka skul Government Boys HS School da kaba khur 2 tylli ki takma ksiar bad 5 ki takma rupa. Katba na ka liang ki kynthei la ïoh da ka North Liberty HS School da kaba khur 5 tylli ki takma ksiar, 2 ki takma rupa bad 2 takma rnong.
Nalor u Deputy Com-missioner, la donlang ruh ka District School Educa-tion Officer (DSEO) Kong A. Syiem, u District Sports Officer (DSO), West Jaiñtia Hills Bah Khroobok Passah, kumjuh ka District Sports Officer (DSO) ka East Jaiñtia Hills Kong Stephanie M. Rapsang, ki nongialam bad dkhot nongkitkam ka WJDSA, ki Principal, ki nonghikai nalor kiwei kiwei ki riew pawkhmat ka thaiñ.
