Khliehriat, Jymmang 05
U Myntri Sorkar bad MLA ka Khliehriat, u Bah Kyrmen Shylla u la ong ba u sngewkmen ban pyntip ba u Myntri ka tnat Sports ka sorkar Jylla u la kular ban pynïoh sa kawei ka madan Artificial Turf ïa ka East Jaiñtia Hills District.
Ïa ka madan artificial turf bad synthetic track bad gallery yn tei ha Wapung Shnong, la ong u Bah Kyrmen Shylla haba plie ïa ka ‘Kynsai Football Coaching Programme’ ba la pynïaid da ka Kyrmen Foundation da ka jingïateh bad ka Rangdajied United Football Club ha Khliehriat ha ka sngi Saitjaiñ.
“Ka East Jaiñtia Hills District kan sa ïoh ruh ïa ka Indoor Stadium kaba yn tei ha Diengshynrum hynrei ïa ka jaka ban tei yn ieh ha ka jingstad ki synjuk ïalehkai ka district,” la ong u Bah Kyrmen.
U la pyntip ruh ba ka Kyrmen Foundation kan ai khusnam ïa ki khynnah kiba tbit bad don sap kiba pyni ïa ki sap ki phong jong ki ha ki rynsan social media bad u la kyntu ïa ki kmie ki kpa ban don ryngkat bad ki khun ha ka por shah hikai khnang ba kin ïoh ban ringdur ha ka por ba ki ïakhun bad pyni ïa ka sap kaba long kawei na ki lad na ka bynta jong ka jingïakop.
U trai ka Rangdajied United u Bah Eugeneson Lyngdoh uba dei u rangïalehkai barim ka India, u la pynpaw ka jingkmen ban ïohi ba ka Kyrmen Foundation ka don ïa ka jingthmu kaba bha tam ban plie lad plie lynti ïa ki heprit jong ka thaiñ.
“Ka sap kaba U Blei u la ai, wat pynlehnoh ei namar kumba ka long mynta ka phutbol ka dei kawei na ki lad ka lynti ym tang ban wanrah ïa ka kamai kajih hynrei ka wanrah ruh ïa ka jingbit jingbiang ha ka met ka phad khamtam eh ha ka jingïadei bad ka imlang sahlang,” la ong u Bah Eugeneson.
U la pyntip ruh ba ki Coach ki ban hikai ïa ki khynnah ki long u Bah P Bareh uba long u Head Coach jong ka Rymbai Shkenshynriah, u Bah Marlangki Suting bad Bah Poibiang Pohshna kiba dei ki rangïalehkai kiba la mihkhmat na ka ri India ha ki lympung ïalehkai bapher bapher.
Ha kane ka sngi la donlang ki MDC ba kynthup ïa u Bah Lasky Rymbai, Deputy CEM JHADC, Bah Finlyness Bareh MDC Rymbai, MLA barim Bah Justine Dkhar, ki nongïalam bad dkhot nongkitkam ka EJHDFA, ki waheh shnong, ki kmie ki kpa bad kiwei kiwei.
