Shillong, Jymmang 06
Ka 4th Roll Ball National Federation Cup ba la pynlong da ka Roll Ball Federation of India ha ryngkat ka Meghalaya Roll Ball Association, ka la poi sha kaba kut ha ka Sngi U Blei ha St. Anthony’s Higher Secondary School, Shillong ha kaba ka Rajasthan bad ka Maharashtra ki la rah ïa ka nam lahduh ha ka liang ki kynthei bad shynrang.
Ha kane ka lympung ïalehkai kaba la neh ar sngi kynthih ïa kaba sdang naduh ka sngi Saitjaiñ, la wan ïashim bynta da ki kynhun kiba na kylleng jong ka ri kiba kynthup na Maharashtra, Rajasthan, Kerala, Gujarat, UP, RSSA, Meghalaya, Assam bad ka Jharkhand ha ka liang ki shynrang, katba ha ka liang ki kynthei ki long ka Rajasthan, UP, Maharashtra, TN, Assam, West Bengal bad ka Meghalaya.
Ïa ka nam lahduh ha ka liang ki kynthei, la rah da ka Rajasthan, lyngba ka jingtbit bad jingïatylli hapdeng jong ki. Ka Tamil Nadu ka lah wan ba-ar ha kaba ki paidbah ki lah ïoh ban sakhi ïa ka jingïalehkai final kaba itynnad eh lyngba ka jingïakhun hapdeng kine ki ar tylli ki kynhun. Katba ka Assam pat ka lah ïoh ban bat ïa ka kyrdan kaba lai.
Haba phai sha ka liang ki shynrang, ka Maharashtra ka lah lah ban pynliem ïa ka Jharkhand bad ïoh ïa ka nam lahduh. Ka Jharkhand ruh ka lah pyni ïa ka jingtbit bad jingïatylli hapdeng jong ki ha kaba ka lah ïoh ïa ka kyrdan ba-ar, katba ka Rajasthan pat ka la ïoh ban bat ïa ka kyrdan balai.
Ha katei ka jingïakhun final la wan ban sakhi ruh da ki katto-katne ki nongshah khot sngewbha kiba kynthup ïa u Working President ka MSOA Bah John F. Kharshiing, Bah Finely L. Pariat, General Secretary, Tapan Acharya, President jong ka Roll Ball Federation, Fr. Anthony Kharkongor, Principal jong ka St. Anthony’s, Bah Alison Kharsyntiew uba dei u Asst. Coach ka Mohammedan SC, Kong Angel Mary Mylliem Umlong kaba la khur ïa ka takma rnong ha ka 43 World arm wrestling Championship, Babit Kharsahnoh, uba la bat ïa ka kyrdan ba shiphew hapoh Ka International Kickboxing bad kiwei.
Kine ki ‘riew pawkhmat ki la don bynta lang ban sakhi ïa ki jingïalehkai hapdeng ki kynhun bapher bapher bad ha ka ban sam ïa ki khusnam bad ki trophy sha ki nongjop.
