Guwahati, Jymmang:
2 ngut ki suba lehnoh kiba long ki dkhot jong ka kynhun lehnoh Al Qaeda na Bangladesh ki la shah kem noh hapoh Guwahati hadien ba la lap ia ka jingwan rung tuh jongki sha India ha ka Sngi Nyngkong.
La ong ba tang mar ia ioh jingtip halor ka jingwan poi jong ki dkhot ka Al Qaeda na Bangladesh shapoh katei ka nongbah lyngba ka rel, ki plit ki la ker-kut bad thwet ia kitei ki lehnoh naba la ioh jingtip ba ka jingwan jong kitei ki lehnoh ka long ban khring ia ki samla shynrang bad ba kin ioh ban pynroi ia ki kam thombor jongki hapoh katei ka jylla.
Ia kitei ki 2 ngut la ithuh kum u Bahar Mia (30 snem) uba long u nongshong shnong jong ka distrik Brahmanbari bad u Rasel Mia (40 snem) uba na ka distrik Netrokona jong ka Bangladesh. Baroh 2 ngut ki dei na ka kynhun Ansarullah Bangla Team (ABT), kaba don jingiadei bad ka kynhun lehnoh ba la shah khang da ka India- ka Al Qaeda.
Kumta, la ong ba kitei ki 2 ngut ki lehnoh ki long ki nongshong shnong trai jong ka ri Bangladesh hi hynrei ki la ioh ban shong ban sah hapoh India khlem ki kot- ki sla kiba biang bad ki la ioh ruh ban pynphriang ia ki jingthmu jongki sha ki lehnoh kiba don ha Assam ban pynjur ia ki kam thombor jongki ha kylleng jong ka Ri India da kaba sdang shwa na katei ka jylla.
Wat ki Aadhaar bad PAN card ba kitei ki 2 ngut ki bat ruh ki lah ban dei kiba shu thok lane kiba shu shna thok tang ban ioh ba kin iaid bad leit sharum- shaneng.
Kumjuh ruh ha u snem ba la leit, la ong ba ki pulit ka Assam ki la ioh kem ia kijuh hi ki lehnoh jong ka Al Qaeda na katei hi ka jylla namar la ong ba kitei ki lehnoh ki ju ioh lad bha ban rung sha katei ka jylla da ki kot- ki sla kiba shu shna thok.
