Patna, Jymmang:
U Symbud Myntri Rangbah barim jong ka Bihar bad u heh nongïalam jong ka seng BJP u Sushil Kumar Modi u la khlad noh ha ka rta kaba 72 snem ha ka janmiet jong ka Lah Sngi U Blei.
U Sushil Kumar Modi ha u bnai, Ïaïong jong une u snem u la pynbna ba u la shah ktah na ka jingpang bampong bad dei na kane ka daw ba um shym la ïakhun ha ka ilekshon Lok Sabha 2024 namar ka jingbym don ha ka met kaba shait bad khlaiñ.
Ïa ka met basah jong u Sushil uba long ruh u MP barim jong ka Rajya Sabha la rah ha ka ïingsah jong u kaba don ha ka thaiñ Rajendra Nagar kaba ha Patna ha kaba la leh burom khatduh ruh ïa ka met basah jong u.
Kiba bun na ki nongïalam jong ka seng BJP kiba kynthup ïa u Myntri Rangbahduh u Narendra Modi bad ki Symbud Myntri Rangbah ba mynta jong ka Bihar u Samrat Chaudhary bad u Vijay Kumar Sinha, ki la pynpaw ka jingsngewsih halor ka jingkhlad noh jong u Sushil bad pynpaw ruh ka jingsngewlem na ka bynta ka ïing ka sem bad ki bahaïing jong u.
