Jaipur, Jymmang:
Ki heh pulit, ki la pynbna ba ki kynhun toh-kit kin sa pynlong ïa ka jingtohkit kaba bniah hadien ba la shem ba ki khubor byrngem buh bad pynbthei bom ha bun tylli ki skul ha Jaipur ki dei kiba thok.
Ki la don kumba san tylli ki skul ha ka nongbah jong ka Rajasthan ha Jaipur, kiba la ïoh ïa ki khubor shah byrngem pynbthei bom ha ka Lah Sngi U Blei, la ïahuh ka tyllong khubor.
Ki khynnah skul bad ki nongtrei jong ki skul, ki la shah pynkynriah na ki skul hadien ba la ïohpdiang ïa kine ki khubor pyntriem bad ka kynhun jong ki pulit ka la pynlong ïa ka jingleit khynra kaba jur ha ryngkat ki ksew sma dien, sha kylleng ki jaka ba don kitei ki skul ba la shah byrngem pynbthei bom.
Kane ka jingjia ka la jia ha ki 12 sngi hadien ba ki la don ki khubor byrngem kiba kum kine ïa kiba la phah sha palat 150 tylli ki skul, kiba don ha Delhi-NCR ha kaba kane ka la buh jingma shibun.
“Ki la don kumba san tylli ki skul ïa kiba la ïoh ïa ki khubor shah byrngem pynbthei bom. Ki pulit ki la leit jurip bniah sha kine ki skul,” la ong u Police Commissioner jong ka Jaipur u Biju George Joseph.
Ïa kine ki khubor byrngem la phah lyngba ka email bad ka kynhun ba dei khmih ka la pyrshang ban khmih bniah khnang ban lap bad ban ithuh ïa u nongphah, la bynrap ki pulit.
Ha ka Sngi U Blei ruh, ki la don kumba 20 tylli ki Hospital, ka IGI Airport bad ka Northern Railways’ CPRO Office ha Delhi kiba la ïohpdiang ïa ki khubor pyntriem lyngba ki email.
Haba la khmih bniah ha kaba ïadei bad ka jing phah ïa ki khubor pyntriem sha ki skul ha Delhi la lap ba u nongphah u dei na Russia, kumba la khmih bniah, la ong ba ki khubor pyntriem ïa kiba la phah sha ki Hospital bad sha ar tylli kiwei pat ki jaka la ïohpdiang na ka kompeni Mailing Service ka ‘beeble.com’, kaba ha Europe, la ïathuh ki heh pulit.
U heh pulit ha ka jingïakren bad ki nongthoh khubor, u la ong ba ïa ka e-mail la phah sha kawei ka Hospital ha kaba la phah kopi ruh sha kiwei pat ha ryngkat kajuh ka rukom thoh. U heh pulit, u la ong ba ka ID jong u nongphah ka dei “[email protected]”, ha kaba la ithuh bad ki briew jong ka Cyber kiba dei khmih ki la pyrshang ban lap sa ïa ka IP Address.
Ka jingthoh kaba don ha ka shithi ba la phah ka la ong, “Nga la buh ïa ki bom hapoh ka Building jong phi. Kin sa pynbthei ïa ki bom ha ka kynta kaba bud. Kane kam dei tang ka jingbyrngem, phi la don tang khyndiat kynta na ka bynta ban pynduhbor ne ban pyllip ïa u bom lem kumta kan sa lyngkien ka snam jong ki briew kiba lui-lui ha ka Building ha kaba kane kan hap ha ki kti ki jong phi. Ka kynhun ba la tip kum ka ‘Court’ ka la don bynta sha lyndet jong kane ka kam pyntriem.”
Ka kynhun Delhi Police Special Cell ka la buh da ka jingujor ejahar bad ka jingtohkit ha kaba ïadei bad ka jingjia ka dang ïai bteng, la ïathuh shuh shuh ka tyllong khubor.
