New Delhi, Jymmang:
Ka seng Aam Aadmi Party (AAP) ha ka Sngi U Blei ka la ong ba ki pulit jong ka Delhi ki la kurup noh ïa ka DVR jong ki CCTV Camera kiba la buh hapoh ka ïingsah jong u Myntri Rangbah u Arvind Kejriwal ha kaba ïadei bad ka jingtohkit halor ka jingpynshisha ba shah thombor ka Swati Maliwal.
Ka seng ka la kynnoh ruh ba ki pulit ki la thmu ban pynduh pyndam noh ïa ki sakhi shwa ka ilekshon, la ïathuh ka tyllong khubor.
Haduh ba la thoh ïa ka khubor kam pat don kano kano ka jingai jubab jong ki pulit ka Delhi ha kaba ïadei bad kane ka bynta.
Kumba la ïathuh la ong ba ka MP jong ka seng AAP ha Rajya Sabha, ha ka jingmudui jong ka, ka la ong ba u nongïarap ba ïajan bad u Kejriwal u Bibhav Kumar u la thap ïa ka da kumba 7 haduh 8 sien bad u la ïai kynjat na ka shadem bad ka kpoh haba ka la leit sha ka ïingsah jong u Myntri Rangbah ha ka 13 tarik, Jymmang.
Hadien ka jingshah thombor jong ka, ka la kynnoh ba ki kti jong ka ki la don jingmynsaw bad ka la sngewshitom ruh ban ïaid. Ka seng AAP ka la ñiew kam kai ïa ki jingpynshisha jong ka bad ong ba ka Maliwal ka la leh mynleh tang namar ka jingshah hukum ha ka seng BJP ban pynjah burom bad buh jingeh ïa u Kejriwal.
Ha ka sngi Saitjaiñ, u Kumar u la shahkem ha ki pulit jong ka Delhi bad ka ïingbishar ka la phah ïa u sha along na ka bynta ban tohkit san sngi.
Ha ka jingai jingkren sha ki nongthoh khubor ha ka Sngi U Blei, u nongïalam jong ka seng AAP u Saurabh Bharadwaj u la ong ba ki pulit ki la dep ban shim ïa ki DVR (Digital Video Recorder) jong ki CCTV Camera.
“Ha ka sngi Saitjaiñ ki la kurup noh ïa ki DVR jong ki Camera kiba la buh ha ki phalor ban rung hapoh ka ïingsah jong u Myntri Rangbah, ha ki jingker kynroh bad ha ka sngi U Blei, ki la kurup noh ïa ki DVR jong ki Camera kiba la buh ha kiwei pat ki bynta jong ka ïing. Ki pulit ki la sdang ban thaw da kawei pat ka khana ha kaba ïa ki CCTV (Camera) kiba la shah pyndam la kurup ïa ki,” u la pynshisha, kumba la ïathuh ka tyllong khubor.
U Bharadwaj u la ong ba ki CCTV Camera bad ki Footage ba la ïoh ban kurup ki dei kiba la bat da ka Public Works Department bad mynta ki la don ha kti ki bor ba dei khmih. U la buh ruh ki jingkylli halor ka jingtyllun jong kiei kiei baroh halor ka jingjia.
“Ïa ka Call la ai da ka Swati Maliwal ha ka 13 tarik, Jymmang bad khlem da ap ïa ka por, kiei kiei baroh ki la paw ha ki lad phah khubor. Ïa ka ejahar halor kane ka jingjia la ujor hapoh ka kyndon 354 (B), kaba long ka bynta kaba ïadei bad ka kynthei, hynrei ïa ka ejahar la sam sha kylleng. Ha kaba ïadei bad kane, u Bibhav Kumar, uba la shah kynnoh donkti ha kane ka jingjia bad ka seng AAP kim shymla ïoh ïa ka kopi jong ka jingujor ejahar,” u la bynrap.
Ki pulit jong ka Delhi ki la buh jingmudui pyrshah ïa u Kumar halor ka jingjrongkti bad thmu ban pynïap hadien ka jingmudui jong ka Maliwal.
Na ka liang u Kumar ruh u la buh kylla da ka jing-ujor ha Civil Lines Police Station, ha kaba u la pynshisha da kaba ong ba ka Maliwal da ka bor ka la rung khlem da ïoh jingbit hapoh ka ïingsah jong u Myntri Rangbah.
