New Delhi, Jymmang:
Ka seng Congress ka la pynmih ïa ka hukum kaba tyngeh sha kito kiba leh ïa ki kam kiba long pyrshah ïa ka seng ha West Bengal bad bthah ïa ka seng ha ka jylla ba ka la dei ban phah ïa ka kaiphot ha kaba ïadei bad ka jingpynsniewdur bad pyn julor ïa ka Board ba thoh bad buh jingpynbna habar ka shlem treikam jong ka seng ha Kolkata.
Shi sngi hadien ba u la kynthoh pyrshah ïa u heh nongïalam jong ka seng Congress ha West Bengal u Adhir Ranjan Chowdhury halor ka jingbuh jingkylli halor ka jingkohnguh bad jingmynjur jong ka heh nongïalam jong ka seng TMC ka Mamata Banerjee ban leit pynïasoh bad ka kynhun synrop INDIA, kiba bun ki Poster bad ki Board ba ju buh ïa ki jingpynbna kiba don ïa ka dur jong u President jong ka seng Congress u Mallikarjun Kharge ki la shah pynsniewdur bad shah tabaiñ sia khamtam kito kiba don ha ka shlem treikam jong ka seng kaba don ha Kolkata ha ka sngi U Blei.
Kum shi bynta ban shim ka jingsngewkhia halor kine ki jingjia, u General Secretary Organisation jong ka AICC, u K C Venugopal u la ong ba ka seng kan ym lah ban pdiang ne lah shah halor kum kine ki jingleh bym kohnguh ne bud ryntih ïa ki jingpynïaid jong ka seng.
