![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Shillong, Jymmang 22
Ka Sunrise Academy ka la pynliem noh ïa ka St Edmund’s da 4 run (DLS method) na ka bynta ban rah ïa ka nam lahduh ha ka Under-15 Inter School Cricket Tournament ba la pynïaid da ka Shillong Cricket Association ha ka sngi Balang.
Ha kane ka jingïakhun final kaba la long ha madan ïalehkai kriket Polo, ka St. Edmund’s kaba la jied ban tied nyngkong ka la kamai 107 run bad shah pynhap 3 wiket ha ki 15 over. U Mannan Surana u la khyrwit ïa ka shiteng spah da kaba ïoh 65 run ha ki 41 bol. Katba u Rohit Sharma u la shim 2 wiket na ka bynta ki 3 over.
Hadien ka jingpynduna ïa ka jingkamai run na ka daw ka jingpynthut u slap, ka Sunrise ka la kamai 33 run ha ki 4 over. U Sparsh u la tied 30 run na ki 16 bol. Ïa ka nam Player of Match la khur da u Rohit Sharma uba la tied 15 run bad shim 2 wiket.
Na ka daw ka jingshah pynthut noh ha u lapbah uba la neh kumba 2 kynta, na ka liang ki bor pynïaid ka SCA la pynkynriah noh ïa ka jingïakhun final jong ka lympung ïalehkai ki kynthei ne ka Women’s League sha ka Sngi Palei ha kaba ka SCA ‘A’ bad ka EWDCA kin ïaknieh ïa ka nam lahduh.
Ha ki jingïakhun semi final, ka SCA ‘A’ ka la pynliem noh ïa ka SCA ‘B’ da 27 run, katba ka EWDCA ka la pynliem ïa ka WKHDCA.