Bhubaneswar, Jymmang:
Namar ka jingdon sa kumba ar tylli ki bynta jong ka jingpynlong ïa ka ilekshon sha Assembly bad Lok Sabha konstitwensi kiba dang sah ha Odisha, u Myntri Rangbahduh u Narendra Modi un sa leit jngoh ïa kane jylla ha ka 29 tarik, Jymmang ban pynlong ïa ka jingïalap ilekshon na ka bynta u kyrtong jong ka seng BJP ka ban long ruh ka sngi kaba khatduh jong ka jingpynlong ïa ka jingïalap ilekshon jong ka bynta kaba khatduh jong ka ilekshon ka ban long ha ka 1 tarik, Jylliew.
Kum shi bynta ban pyntip halor ka jingleit jngoh jong u Myntri Rangbahduh, u nongpynïaid bad u nongkhmih jong ka seng halor ki kam ba ïadei bad ka ilekshon ha Odisha u Vijay Pal Singh Tomar ha ka jingïakren bad ki nongthoh khubor ha ka Sngi Balang u la ong ba u Modi un sa ai jingkren ha ki ar tylli ki jingïalang paidbah ki ban long ha Balasore bad ha Kendrapara Parliamentary konstitwensi.
U MP mynta na Balasore Pratap Chandra Sarangi u la ïakhun ïa ka ilekshon na Lok Sabha konstitwensi katba u Vice-President jong ka seng ha ka ri bad u MP barim u Baijayant Panda u la long u kyrtong na Kendrapara. U Myntri Rangbahduh u la sdang ïa ka jingïalap ilekshon jong u na Berhampur ha ka 6 tarik, Jymmang bad pynlong ïa ka jingïalap ilekshon ha shi lynter ki surok ha Bhubaneswar ha ka 10 tarik, Jymmang.
U la ai jingkren ha ki lai tylli ki jingïalap ilekshon kiba la long ha Kandhamal, Balangir bad Bargarh ha ka 11 tarik, Jymmang. Ka jingleit jngoh biang jong u sha ka jylla ka la long ha ka 19 tarik, Jymmang. U Myntri Rangbahduh u la pynlong ïa kawei pat ka jingïalap ilekshon ha ki surok ha Puri ha ka 20 tarik, Jymmang bad ai jingkren ha ki ar tylli ki jingïalang paidbah kiba la long ha Angul bad Cuttack.U Myntri jong ka sorkar kmie uba dei khmih ïa ka tnat ki kam pohïing u Amit Shah u la dei ban leit jngoh ïa ka jylla ha ka 25 tarik, Jymmang. Un sa ai jingkren ha ki jingïalang paidbah ki ban long ha Baripada, Chandabali, Korei bad Nimapara.
U President jong ka seng BJP ha ka jylla u Manmohan Samal u ïakhun na Chandabali Assembly konstitwensi. u President jong ka seng ha ka ri u JP Nadda, u Myntri Rangbah jong ka Uttar Pradesh u Yogi Adityanath bad u Myntri Rangbah jong ka Assam u Himanta Biswa Sarma ki la don bynta ha ka jingïalap ilekshon hynnin ka sngi na ka bynta ki kyrtong jong ka seng. Ka bynta kaba lai jong ka jingpynlong ïa ka ilekshon ha ka jylla kan sa long ha ka 25 tarik, Jymmang.
