Jowai, Jymmang 26
Ka West Jaiñtia Boxing Association (WJBA) ka la pyntip ba kan sa pynlong noh ïa ka Boxing Coaching Camp ne ka jingai jinghikai ha ka jingïalehkai ïakura na ka bynta ki khynnah ha ka rta kaba 8 snem shaneng ban pynlong ha Ladthadlaboh, Jowai.
Ha kaba ïadei bad kane, na ka liang jong u President ka WJBA u Bah Wanbeit Ksoo u la pyntip ba na ka liang ka synjuk ka khot bad ka wer ïa ki khynnah kiba sngewtynnad ïa ka jingïalehkai boxing ba kin wan shakhmat ban ïashim bynta ha kane ka jingai jinghikai.
U la pyntip ruh ba kane ka coaching camp kan sdang naduh ka 28 tarik mynta u bnai ha madan Ladthadlaboh, kata ban pynlong naduh ka por 5 baje man ka step. Ïa ki jingtip kiba kham bniah, kino kino kiba kwah ban ïashim bynta ki lah ban phone ha une u number 9612691732.