Chennai, Jylliew:
Ki la don kumba 29 ngut ki briew kiba la ïap bad palat 60 ngut kiwei pat ki la shah sumar ha ki hospital ha ka Sngi Balang hadien ba la pynshisha ba ki la dih ïa ka kyiad kaba la long bih ha Kallakurichi distrik, kaba don ha Tamil Nadu, la ïathuh ki pulit hynin ka sngi. Kumba la ïathuh la ong ba ka jingïap jong ki briew ka lah ban nang kiew naba ki dang don bun kiba dang shitom jur, ki la ong.
U Myntri Rangbah jong ka Tamil Nadu u MK Stalin u la ong ba u la don ha ka jingkyndit kaba khraw haba u la ïoh jingtip halor ka jingïap jong kine ki briew bad u la ong ba la dei ban pynshitom da kaba tyngeh katkum ki kyndon aiñ pyrshah ïa ki briew kiba long ka daw halor ka jingjia.
Ha ka jingpyllait khubor lyngba ka rynsan X, u MK Stalin u la ong, “Nga la dap da ka jingkyndit kaba khraw ban ïohsngew ïa ka khubor halor ka jingïap jong bun ngut ki briew namar ka jingdih ïa ka kyiad kaba la kylla long bih ha Kallakurichi. Kito kiba la long ka daw halor ka jingjia ki la shahkem. Ka jingpynshitom kan sa long da kaba tyngeh pyrshah ïa kito ki heh sorkar ki bym lah ban khanglad ïa kum kine ki jingjia. Yn sa ai ïa ka jingpynshitom kaba mynta mynta pyrshah ïa kito kiba donkti ha ka jingjia. Kiba kum kine ki jingjia kiba ktah ïa ka imlang ka sahlang la dei ban ai da kaba tyngeh.”
Ha kaba ïadei bad ka jingjia, uwei u briew ïa uba la tip kyrteng kum u K Kannukutti, 49, u la shahkem hadien ba la ïoh ban kurup ïa ka kyiad kaba la die beaiñ kaba don 200 litre na u, ha kaba la ong ba haba la khmih bniah ïa kane ka kyiad la lap ba ka la don ka jingkhleh da ka Methanol, la ïathuh ka jingthoh kaba la wan na ka sorkar Tamil Nadu.
U Stalin u la hukum ïa ka kynhun Crime Branch-Crime Investigation Department (CB-CID) ban tohkit bniah halor ka jingjia.
Ka sorkar TN ka la buh biang da u Collector jong ka Kallakurichi distrik u Sravan Kumar Jatavath bad weng kam shipor ïa u Superintendent of Police u Samay Singh Meena. Shuh shuh la ïathuh ba ki la don 9 ngut ki pulit, kynthup ïa kito kiba na ka kynhun ba dei ban pyntreikam pyrkhing ha Kallakurichi kiba la shah weng kam shipor, la bynrap shuh shuh ka jingthoh ba la phah da ka sorkar.
U MS Prasanth, uba long u Collector uba thymmai jong ka Kallakurichi distrik, u la leit jngoh ïa ki nongpang kiba shah sumar ha Government Medical College Hospital. U Rajath Chaturvedi u la long u Superintendent of Police uba thymmai jong ka distrik.
U Stalin u la phah ruh ïa ki heh myntri kiba kynthup ïa u EV Velu bad u Ma Subramanian sha Kallakurichi na ka bynta ban ai jingïarap sha ki longïing kiba la shah ktah jur na kane ka jingjia.
Ki la don kumba 15 ngut ki briew kiba la shah sumar ha Jawaharlal Institute of Postgraduate Medical Education & Research (JIPMER) kaba don ha Puducherry.
U Lat jong ka Tamil Nadu u RN Ravi u la pynpaw ïa ka jingsngewlem halor ka jingïap jong kine ki briew bad kitbok ïa kiba dang shah sumar ha ki hospital ba kin ïoh jingkoit noh kham kloi.
