Bhubaneswar, Risaw:
Hadien ba la pynslem da ki bnai, khatduh ka sorkar jylla ka la pynbeit ryntih ïa ka jingshakri jong ki Junior (schematic) kiba la thung ha ka por 2023-24.
Ka tnad Skul bad Mass Education ka la pynmih ïa ka jingpynbna halor kane ha ka sngi Palei, da kaba pynlong ïa ka tarik treikam jong ka jingpynlong nonghikai jong ki kum ka 1 tarik u Kyllalyngkot.
Kane ka jingpyntreikam, kan sa ai jingmyntoi palat ïa ki 13,000 ngut ki Junior Teacher kiba la shah thung ha ka Schematic Basis hapdeng u 2023-24, la ïathuh ki heh ba dei khmih.
Katkum ka jingpynbna, ïa ki Juniour Teacher ba la thung lyngba ka rukom treikam bad ba dang bteng ha ka jingshakri yn pynlong Regular kum ki nonghikai ba ïarap ha ka kyrdan-V(A) jong ka Elementary Cadre kaba sdang naduh ka 1 tarik u Kyllalyngkot, katkum ka jingpyndep ïa ki kyndon ba la buh.
Ka jingpynbna, kaba la pynmih ha ka jaka jong ka hukum ba mynshuwa jong ka tnad ha ka 2 tarik, Ïaïong, ka la ong ba ïa ka jingshakri jong ki nonghikai naduh ki tarik jong ki ban rung haduh ka 31 tarik u Nohprah, 2025, yn kheiñ kum ka jingshakri ba la ai ha ka kyrdan ba la buh lypa/ba la ïateh kular.
Kane ka por kan ym ai kano kano ka hok ban dawa ïa ka jinglong rangbah jong kiba shah thungkam ba man ka por lane ki jingmyntoi ba mih na ka jingshakri ba man ka por.
Ki nonghikai kin ïoh ïa ka jingsiew kaba man ka por bad kiwei kiwei ki jingmyntoi ba lah ban pdiang jong ki nonghikai nongïarap ha ka Level-V(A) naduh ka 1 tarik, Kyllalyngkot, katkum ki kyndon bad ki jingbthah jong ka sorkar kiba treikam, la ong ka jingpynbna.
Kane ka jingpynkylla ka long tang katto katne bnai hadien ba u Myntri Rangbah ka Jylla u Mohan Charan Majhi u la pynbna ban pynlong Regular ïa kine ki nonghikai.
Hadien kata ka sorkar ka la pynmih ïa ka jingpynbna ha ka 2 tarik, Ïaïong, kaba la buh ïa ka rukom pynlong aiñ ïa ki. Hynrei ki nonghikai ki la sngewsih namar ka jingpynslem ban pyntreikam ïa ka hukum ban pynlong ryntih ïa ki nonghikai.
Ha ka 18 tarik, Nailur, da ki hajar ngut ki Junior Teacher hapoh ka lama jong ka Odisha Junior Teachers’ Association ki la pynlong ïa ka jingïakhih ha Mahatma Gandhi Marg ha ka nongbah, da kaba dawa ban pynbeit ryntih mardor bad ban pynkut noh ïa ka rukom thung kam katkum ka jingïateh kular.
Ki la kynnoh ba wat hapdeng ka jingpynbna paidbah jong u Myntri Rangbah bad ka jingpynbna ha ka 2 tarik, Ïaïong, hynrei ka jingpynlong aiñ kam shym la pyndep.
Ka seng ka la kynnoh ruh ba ka sorkar jylla ka dang hap ban ujor ïa ka Affidavit ha ka mukotduma kaba ïadei bad katei ka kam kaba dang sahkut ha ka ïingbishar ba hakhlieh duh bad ka la dawa ban shim khia mardor ban pynsuk ïa ka jingpynlong aiñ.
