Washington, Jylliew:
U President barim ka United States- u Donald Trump ha ka jingkren kaba u la pyllait paidbah ha kine ki khyndiat sngi ba la leit, u la ong ba kito ki khynnah pule kiba pass bad pyndep ia ka ‘Gradutate’ na ki skulbah ka United States, ki don ka hok ba kin ioh ia ka ‘Green Card’ kaba mut ba kin lah ban shong- ban sah hapoh ka ri.
Ha ka jingiakren jong ki heh ka tnat pule bniah kiba dei pule ha ki lain saian katkum ka jingstad jong kane ka juk ba mynta, kitei ki nongialam ki la iathuh ia u Trump ba ka US ka donkam ban ioh ia shibun ki nongtrei kiba tbit ha ki liang ka jingshemphang katkum ka jingstad saian ban kyntiew ia ka ‘Tech Industry’.
Kumta ki don ki nong-ialam na katei ka liang kiba la kyrpad ia u Trump ba un kyntiew ia ka U.S haba iadei bad katei ka bynta lada u ioh ban long biang u nongialam jong ka ri hadien- habud, ha kaba u Trump ruh u la mynjur ban leh ia kata bad kumta u la kular ba kito ki khynnah pule kiba na kiwei ruh ki ri hynrei kiba la pyndep ia ka ‘Graduate’ na United States, ki dei ban ioh ka hok ban shong- ban sah hapoh United States bad ba kin nang iatrei lang bad ka US ynda ki la tbit bad long kiba bit ban kyntiew ia ka US ha ka liang ka ‘Technology’.
Ia ka Green Card, la ju tip ruh kum ka ‘Permanent Resident Card’ lane ka Card ka ban ai ia ka hok long trai ri, la ong ba katei ka Card kan ailad ia ki paidbah ba na kiwei pat ki ri ba kin ioh ban shong- ban sah hapoh United States kum ki nongshong shnong ba pura jong ka US.
Watla katta, katei ka jingkren jong u Trump kam shym long kaba shai la kan treikam lut ne em ia baroh ki nongwei kiba dei na kano- kano ruh ka ri, lane ka jingmut jong u Trump kan long tang ia ki nongshong shnong jong kito ki ri kiba ka US ka sngew jan ruh hynrei u la shu kren lypa bad ong ba u sngew dei ia kito kiba pyndep ia katei ka kyrdan jingpule na US ba kin ioh ia ka hok long trai hapoh ka ri.
Katba na ka liang u Director jong ka American Immigration Council pat, u Aaron Reichlin- Melnick, u la pynphai ktien halor katei ka jingkren jong u Trump bad ong ba u sngew thamula ban iohsngew ia kitei ki kyntien na utei u President barim jong ka ri namar u la ong ruh ba ha u snem ba wan ka khlam Covid-19, dei ma u bad ka sorkar jong u hi kiba pynmih ia ki phew jait ki aiñ bad ki kyndon ban pyrkhing bad phah mih noh ia ki khynnah pule jong kiwei pat ki ri bad kane ka la pynlong ia kitei ki khynnah pule bad ki paidbah nongwei ba kin duh ka jingsngew shngaiñ ba kin shong- kin sah hapoh ka ri US.
